Shefi i grupit parlamentar të PDK-së, Adem Grabovci, ka bindjen se opozita nuk ka të drejtë të sillet në formën që ka zgjedhur ndaj institucioneve të shtetit. Ai kujton se pozita ende nuk pati mundësi të deklarohet në Kuvend për çështje mjaft të rëndësishme që po e presin vendin dhe që kanë të bëjnë me jetën e qytetarit në veçanti. Veprimet e opozitës, Grabovci i quan të paarsyeshme. “Sa i përket veprimeve që ka përdorur opozita ne asnjëherë nuk jemi pajtuar dhe nuk mund t’i arsyetoj askush.
Nuk kanë të drejtë të sillen në atë mënyrë me institucionet e shtetit të Kosovës, aq më tepër kur kemi të bëjmë me institucionin me të lartë vendimmarrës, Kuvendin e Kosovës, vendin ku duhet të debatohet, ku duhet të ngritën të gjitha shqetësimet dhe të merren vendimet të përcaktohen rrugët për të ardhmen, prandaj ky është shqetësim.
Ne prej kohësh kemi deklaruar se na është pamundësuar deklarimi ynë, e drejta e fjalës që është kushti elementar në demokraci”, tha Grabovci.
