Teksa zv.ndihmës sekretari i shtetit, Matthew Palmer, ka shprehur qëndrimin zyrtar të SHBA-ve për datën e zgjedhjeve, Presidenca ka heshtur.
Përmes një reagimi, institucioni i Presidentit ka komentuar vetëm mbi kongresmenin Eliot Engeli, duke theksuar se Ilir Meta po bën gjithçka për të organizuar zgjedhje gjithëpërfshirëse.
Më herët, Palmer u shpreh se Uashingtoni njeh vetëm 30 Qershorin si datë zgjedhjesh lokale të Shqipërisë, dhe jo 13 Tetorin e shpallur sot nga Presidenti.
Reagimi i pasdites së të enjtes:
Presidenti i Republikës Sh.T.Z Ilir Meta vlerëson deklaratën e përgjegjshme, të vëmendshme e njëkohësisht shqetësuese të Kryetarit të Komisionit të Politikës së Jashtme të Kongresit Amerikan, Eliot Engel, këtij miku të sprovuar të Shqipërisë, Kosovës dhe shqiptarëve, mbi situatën e vështirë politike në Shqipëri dhe mbi rëndësinë imediate të rivendosjes së dialogut dhe shtetit të së drejtës.
Presidenti i Republikës siguron Kryetarin e Komisionit të Jashtëm të Kongresit Amerikan, z.Eliot Engel dhe të gjithë miqtë e vërtetë të Shqipërisë në Shtetet e Bashkuara të Amerikës, se po bën dhe do të bëjë të gjitha përpjekjet që Shqipëria të mund të organizojë zgjedhje vendore gjithëpërfshirëse, demokratike, me standarde, të lira dhe të ndershme, ashtu siç e meriton një vend i NATO-s dhe një vend që dëshiron të bëhet anëtar i Bashkimit Europian.
