Irani ka mohuar një pretendim të zëvendëspresidentit amerikan JD Vance se do të lejojë inspektorët bërthamorë të kthehen në vend, pas raundit të parë të bisedimeve midis Uashingtonit dhe Teheranit për të arritur një marrëveshje përfundimtare për t’i dhënë fund luftës.
Pas negociatave në Zvicër, Vance tha se diskutimet me Agjencinë Ndërkombëtare të Energjisë Atomike (IAEA) mund të fillojnë që sot.
Por ministria e jashtme e Iranit i tha medias shtetërore se Teherani nuk kishte marrë “asnjë angazhim të ri” për inspektimet bërthamore.
Kjo ndodhi ndërsa SHBA-të hoqën dorë përkohësisht nga sanksionet, duke i lejuar Iranit të shesë naftë në dollarë amerikanë për herë të parë në dekada.
Në një deklaratë të përbashkët të lëshuar të hënën, ndërmjetësit Katar dhe Pakistan thanë se pas raundit të parë të bisedimeve në vendpushimin zviceran të Bürgenstock, SHBA-të dhe Irani kishin rënë dakord për “një plan veprimi drejt arritjes së një marrëveshjeje përfundimtare brenda 60 ditëve”.
Vance i përshkroi bisedimet si të tilla që kishin hedhur një “themel shumë të mirë”.
Zëvendëspresidenti amerikan tha se ekipet kishin diskutuar rihapjen e Ngushticës së Hormuzit dhe armëpushimin rajonal.
Heqja dorë nga sanksionet prej 60 ditësh e lëshuar nga Thesari i SHBA-së të hënën shkatërron shtyllat qendrore të embargos afatgjatë të Uashingtonit, e cila historikisht ka penguar ekonominë e Teheranit.
Licenca e emergjencës autorizon prodhimin, shitjen dhe dërgimin e naftës bruto dhe petrokimikateve iraniane deri më 21 gusht.
Nafta iraniane mund të importohet direkt në SHBA, sipas lehtësimit të sanksioneve. Po ashtu do të zhbllokohen transaksionet bankare, sigurimet për transportin si dhe eliminon rrjetet komplekse që Irani ka përdorur më parë për të shitur naftë të papërpunuar.
Sekretari i Thesarit, Scott Bessent, tha se në këmbim, Teherani ishte zotuar ta mbante të hapur Ngushticën jetike të Hormuzit dhe të lejonte inspektorët bërthamorë të IAEA-s të ktheheshin në vend.
