Gjashtë persona të dyshuar për trafikim droge janë vrarë në një sulm ajror të forcave amerikane në ujërat ndërkombëtare pranë brigjeve të Venezuelës, ka bërë të ditur presidenti i SHBA-ve, Donald Trump.
Sipas tij, varka e shënjestruar ishte pjesë e trafikantëve të drogës dhe ndodhej në një nga rrugët e njohura të kontrabandës. Trump publikoi një video të sulmit në rrjetin Truth Social, ku shihet varka duke marrë flakë pas një goditjeje ajrore.
Ky është sulmi i pestë që nga shtatori, pasi Pentagoni e ka cilësuar përplasjen me kartelët e drogës si “konflikt të armatosur”.
Autoritetet amerikane besojnë se varka i përkiste bandës famëkeqe venezueliane Tren de Aragua, e shpallur organizatë terroriste nga SHBA në fillim të vitit. Por qeveria e Venezuelës pretendon se grupi është shpërbërë që në vitin 2023.
Ndërkohë, tensionet mes dy vendeve janë në rritje. SHBA ka shtuar praninë ushtarake në Karaibet jugore, duke përfshirë anije luftarake, nëndetëse dhe avionë F-35 të dislokuar në Porto Riko.
Presidenti venezuelian Nicolás Maduro, i akuzuar nga SHBA për lidhje me trafikun e drogës akuza që ai i mohon ka firmosur një dekret që i jep vetes kompetenca të shtuara sigurie në rast të një ndërhyrjeje amerikane.
