Egjipti e kishte paralajmëruar Izraelin për rreziqet e dhunës së mundshme tre ditë përpara sulmit të Hamasit, tha Michael McCaul, kryetar i Komitetit të Punëve të Jashtme të Dhomës së Përfaqësuesve të SHBA-së.
“Ne e dimë se Egjipti i kishte paralajmëruar izraelitët tre ditë më parë se një ngjarje e tillë mund të ndodhte.”, tha McCaul në Kongresin Amerikan, sipas gazetës izraelite Haaretz.
Të hënën një raport në gazetën izraelite Yedioth Ahronoth (Ynet) tha se shefi i inteligjencës egjiptiane kishte paralajmëruar kryeministrin izraelit dhjetë ditë para sulmit të Hamasit, por Benjamin Netanyahu e injoroi paralajmërimin dhe e minimizoi kërcënimin. Zyra e kryeministrit izraelit e cilësoi publikimin si inekzistent.
“Ne e kishim paralajmëruar Izraelin për diçka të madhe, por ata e kishin mendjen diku tjetër.”, tha një zyrtar egjiptian i inteligjencës për Associated Press dy ditë më parë, duke shtuar një lidhje tjetër me “ngarkesën” e përgjegjësive që rëndojnë mbi shërbimet e inteligjencës dhe ushtrinë izraelite, pasi grupi i Hamasit i kapi në befasi.
Sipas zyrtarit egjiptian, izraelitët preferuan të fokusoheshin në Bregun Perëndimor dhe minimizuan seriozitetin e kërcënimit nga Gaza. “Ne i paralajmëruam se situata do të shpërthejë së shpejti, vërtet shumë shpejt dhe se shpërthimi do të jetë i madh. Por ata i nënvlerësuan ato paralajmërime”.
Në të njëjtën kohë, qeveria e Egjiptit është në kontakt të ngushtë me Izraelin dhe Hamasin në një përpjekje për të shmangur përshkallëzimin e mëtejshëm të konfliktit mes tyre dhe për të siguruar mbrojtjen e izraelitëve të mbajtur peng nga persona të armatosur, thanë dy burime të inteligjencës egjiptiane. Egjipti i ka kërkuar Izraelit të tregojë vetëpërmbajtje dhe Hamasit të kujdeset për t’i mbajtur pengjet në gjendje të mirë, por edhe të hapë mundësinë e deeskalimit së shpejti./m.j
