Ndërsa Shtetet e Bashkuara përpiqen të bindin Kinën që të ndërpresë bashkëpunimin me Iranin, Teherani po thellon lidhjet e tij me vendet e BRICS, duke shfrytëzuar takime diplomatike paralele.
Presidenti amerikan Donald Trump po viziton Kinën, ku pritet të ushtrojë presion për të frenuar bashkëpunimin diplomatik, ekonomik dhe ushtarak të Pekinit me Teheranin. Paralelisht, Ministri i Jashtëm iranian, Abbas Araghchi, ndodhet në Indi për të marrë pjesë në takimin e BRICS.
“Dy mekanizma paralelë janë në proces”, tha për Al Jazeera-n Abas Aslani, bashkëpunëtor i lartë kërkimor në Qendrën për Studime Strategjike të Lindjes së Mesme.
Sipas Aslanit, Uashingtoni kishte shpresuar që një “fitore në luftë me Iranin” të shërbente si levë ndikimi ndaj Kinës.
“Tani është e kundërta. Ata po kërkojnë ndihmë nga Kina për të ushtruar presion mbi Iranin”, shtoi ai, duke shprehur dyshime serioze nëse Pekini do të pranojë të bashkëpunojë.
Analisti vuri në dukje se kontrolli amerikan mbi Gjirin Persik dhe objektet energjetike iraniane mund të përdoret në planin afatgjatë si levë kundër Kinës, gjë që minon besimin midis dy fuqive të mëdha.
“Irani po përpiqet të përdorë të gjitha mundësitë për të kompensuar situatën aktuale”, tha Aslani.
Zhvillimet vijnë në një moment tensioni të lartë gjeopolitik, ku Irani synon të diversifikojë aleancat e tij ekonomike dhe strategjike brenda BRICS, ndërsa SHBA-të përpiqen të ruajnë levën e tyre ndaj Kinës duke përdorur çështjen iraniane.
