Ushtria amerikane ka kryer një tjetër sulm ndaj një anijeje të dyshuar për trafik droge në Paqësorin lindor, duke vrarë dy persona. Sipas Komandës Jugore të SHBA-së (SOUTHCOM), sulmi u zhvillua të dielën (23 gusht) dhe shënon rikthimin e goditjeve amerikane ndaj mjeteve të dyshuara për trafik droge pas një pauze prej më shumë se dy muajsh. “Task Forca e Përbashkët e Hemisferës Perëndimore ekzekutoi një sulm kinetik vdekjeprurës ndaj një anijeje të profilit të ulët që operonte përgjatë rrugëve të përcaktuara të trafikimit të drogës në Paqësorin Lindor”, deklaroi SOUTHCOM.
Autoritetet amerikane bëjnë me dije se dy persona u vranë në operacion. Sulmet e këtij lloji ishin ndërprerë që prej 21 qershorit, ndërsa deri më tani nuk është bërë e qartë arsyeja e pauzës në operacionet amerikane në Karaibe dhe Paqësorin lindor. Goditjet janë pjesë e fushatës amerikane “Operation Southern Spear”, e nisur në shtator 2025 kundër grupeve që Washingtoni i akuzon për trafik droge. Sipas të dhënave të publikuara deri në fund të korrikut, fushata kishte përfshirë dhjetëra sulme ndaj anijeve dhe më shumë se 200 viktima. Komandanti i SOUTHCOM, gjenerali Francis L. Donovan, përsëriti angazhimin e ushtrisë amerikane për goditjen e rrjeteve të trafikimit të drogës, duke deklaruar se objektivi është ndërprerja e operacioneve dhe çmontimi i strukturave drejtuese të karteleve.
Fushata e administratës së presidentit Donald Trump ka shkaktuar debate të forta në Shtetet e Bashkuara. Disa ligjvënës dhe organizata të të drejtave të njeriut kanë vënë në pikëpyetje bazën ligjore të sulmeve dhe kanë argumentuar se personat e dyshuar për trafik droge duhet të përballen me ndjekje penale, në vend që të goditen ushtarakisht. Edhe disa zyrtarë dhe ekspertë të zbatimit të ligjit kanë shprehur skepticizëm mbi efektivitetin e kësaj strategjie në frenimin e trafikut të drogës në rajon.
Senatori demokrat Tim Kaine ka deklaruar më herët se, bazuar në informacionet e klasifikuara që ka shqyrtuar, disa prej sulmeve mund të kenë shkaktuar vdekjen e personave që nuk ishin të përfshirë në trafikun e drogës. Ai i ka kërkuar presidentit Trump të rishikojë rrethanat e operacioneve, duke i cilësuar ato si të paligjshme, të kushtueshme dhe joefektive.
