Presidenti amerikan Joe Biden ka njoftuar një paketë të re ndihme ushtarake prej 375 milionë dollarësh për Ukrainën. Kreu i Shtëpisë së Bardhë e bëri këtë njoftim gjatë takimit me homologun e tij ukrainas Volodimir Zelensky në samitin e udhëheqësve të G7 në Japoni.
“Paketa e re e ndihmës përfshin më shumë municione, artileri dhe automjete të blinduara për të forcuar aftësitë e Ukrainës në fushën e betejës. Ne po mbështesim gjithashtu përpjekjet për paqe dhe integritetit territorial të Ukrainës”, tha Biden.
Zelensky falënderoi Shtetet e Bashkuara për paketën e re të ndihmës.
“Unë i jam shumë mirënjohës popullit amerikan dhe kongresit. Jam i lumtur që mes dy vendeve tona ka marrëdhënie të forta”, tha Zelensky.
Zelensky u pyet nga gazetarët edhe për situatën në qytetin e Bakhmutit.
“Ata kanë shkatërruar gjithçka, nuk ka ndërtesa. Është për të ardhur keq. Është një tragjedi… por sot Bakhmuti është vetëm në zemrat tona”.
Por teksa pala ruse pretendon se qyteti ka rënë në duart e tyre deklaratat e Zelensky-t me Biden konfuzuan gazetarët. Më pas një zëdhënës i presidentit ukrainas konfirmoi se Kievi ka ende kontrollin e qytetit lindor.
Duke iu drejtuar mediave në fund të samitit të G7 në Hiroshima sot, Joe Biden tha se kishte marrë garanci nga Volodymyr Zelenskyy se trupat e Ukrainës nuk do të përdorin avionë luftarakë F-16 të ofruara nga Perëndimi për të sulmuar territorin rus.
Sipas mediave të huaja, Biden u tha gazetarëve se avionët luftarakë F-16, mund të përdoren “kudo që trupat ruse janë brenda Ukrainës”.
Kjo deklaratë e Biden vjen pasi SHBA autorizoi të premten aleatët perëndimorë për t’i dhënë avionë luftarakë F-16 Ukrainës dhe miratuan trajnimin e pilotëve ukrainas për të drejtuar avionët në fjalë.
Lëvizja e zotit Biden u mirëprit nga Mbretëria e Bashkuar, Holanda, Belgjika dhe Danimarka.
Nga ana tjetër, duke folur në një konferencë shtypi në G7, Volodymyr Zelenskyy falënderoi SHBA-të dhe aleatët për avionët luftarakë F-16 që iu ofruan Ukrainës.
“Ne me të vërtetë kemi punuar për një kohë të gjatë politikisht me partnerët tanë për të marrë rezultatin e dëshiruar të forcimit të qiellit tonë,” tha Zelenskyy.
“Ne jemi mirënjohës për këtë. Ne i jemi vërtet mirënjohës Shteteve të Bashkuara të Amerikës”, tha Zelensky.
Zelenskyy thotë se është e rëndësishme që Ukraina të ketë trajnime pilotësh dhe që pilotët e saj të jenë “sa më të arsimuar, dhe sa më të trajnuar e me përvojë”, në drejtimin e F-16 të rinj.
Ai thotë se deri më tani nuk është në gjendje të thotë se sa avionë do të marrë Ukraina, por ka besim se do t’i marrë ato.
Në përpjekje për t’iu përgjigjur pyetjeve të tjera në lidhje me avionët dhe artilerinë nga BBC, Zelenskyy i kërkon gazetares të përsërisë pyetjet e saj, duke thënë: “Më falni, jam pak i lodhur”.
Ai përsërit se nuk e di se sa avionë F-16 do të marrë Ukraina, duke thënë: “Kjo nuk është sekret. Unë me të vërtetë nuk e di.”
Zelenskyy thotë se “është shumë e vështirë të zgjidhet kjo krizë nëse jemi vetëm”, prandaj ai është “shumë i lumtur” që po merr mbështetje nga vendet e G7.
Në lidhje me marrjen e armëve nga kombet e tjera, ai thotë: “Po, do të doja shumë. Do të dëshiroja që çdo shtet që është në gjendje të na ndihmojë neve, të na ndihmojnë”.
Vizita e Zelensky-t në samitin e G7-s ishte e suksesshme pasi iu dha leja që pilotët ukrainas të stërviten me avionë luftarakë F-16./m.j
