“SHBA mbështet aksionin opozitar dhe protestat”/ Boçi: Rama një hap larg derës së burgut!

Nënkryetari i Partisë Demokratike, Luçiano Boçi, i ftuar në emisionin “A2 Puls” nga Bruna Çifligu, ka deklaruar se kryeministri Edi Rama ndodhet në pikën më të dobët politike, ndërsa sipas tij, presioni i brendshëm dhe ai ndërkombëtar po shkojnë paralelisht drejt një zgjidhjeje politike. 

Boçi theksoi se protestat e opozitës do të vijojnë dhe do të përshkallëzohen në forma të ndryshme, si në rrugë ashtu edhe në parlament, me një objektiv të vetëm: largimin e Edi Ramës dhe krijimin e një qeverie tranzitore. Sipas tij, situata në Shqipëri nuk përfaqëson më një qeverisje legjitime, por një regjim të mbështetur në manipulim zgjedhor, kapje institucionesh dhe lidhje me krimin e organizuar, shkruan A2 CNN. 

“Rama është para derës së burgut. Ai po mbron pushtetin për të mbrojtur veten”, deklaroi Boçi, duke shtuar se çdo veprim i kryeministrit ka si synim shpëtimin personal dhe jo interesin publik. 

Në lidhje me faktorin ndërkombëtar, Boçi u shpreh se Shtetet e Bashkuara të Amerikës janë gjithnjë e më pranë qëndrimeve të opozitës, edhe pse jo gjithmonë përmes deklaratave publike direkte. Ai solli si shembull mungesën e një njoftimi paralajmërues nga ambasada amerikane gjatë protestave të fundit, gjë që sipas tij përbën një sinjal të qartë mbështetjeje për aksionin opozitar. 

“SHBA na mbështet. Ka miratim të qartë që opozita të vazhdojë protestat në të gjitha format dhe mënyrat”, u shpreh Boçi, duke shtuar se raportet ndërkombëtare, përfshirë ato të OSBE/ODIHR, kanë dëshmuar grabitjen e zgjedhjeve dhe shkrirjen e shtetit me partinë. 

Sipas tij, reagimet ndërkombëtare mund të mos jenë të menjëhershme, por janë të vazhdueshme dhe strategjike, ndërsa presioni i qytetarëve do të jetë vendimtar. 

“Regjimet rrëzohen me protesta. Dhe ky regjim do të largohet nga presioni i shqiptarëve”, përfundoi Boçi.