Shtëpia e Bardhë njofton se Donald Trump është i furstruar me Ukrainën dhe Rusinë. “Presidenti nuk dëshiron më shumë bisedime, ai dëshiron veprime”, u shpreh zëdhënësja Karoline Leavitt, duke shtuar se Shtetet e Bashkuara mund të dërgojnë një përfaqësues në bisedimet europiane vetëm “nëse ka një shans të vërtetë për të nënshkruar një marrëveshje paqeje”.
“Presidenti është jashtëzakonisht i frustruar me të dyja palët e kësaj lufte dhe është i lodhur nga takimet vetëm për hir të takimeve. Ai nuk dëshiron më shumë biseda. Ai dëshiron veprime. Ai dëshiron që kjo luftë të marrë fund. Dhe administrata ka kaluar më shumë se 30 orë vetëm në dy javët e fundit duke u takuar me rusët, ukrainasit dhe europianët dhe duke folur edhe me ta”, tha Karoline Leavitt, zëdhënëse e Shtëpisë së Bardhë.
Vetë presidenti Trump tha se Amerika nuk është e përfshirë në luftë, por vetëm në negociata. Por konfirmoi se do të jetë pjesë e garantuesve të sigurisë për Ukrainën dhe Europën, shkruan A2 CNN.
“Quhet marrëveshje sigurie. Ne do të ndihmonim me sigurinë sepse është një faktor i domosdoshëm për ta arritur atë. Mendova se ishim shumë afër me Rusinë dhe Ukrainën për të pasur një marrëveshje. Në fakt, përveç Presidentit Zelensky, popullit të tij i pëlqen koncepti i marrëveshjes. Ka katër ose pesë pjesë të ndryshme, paksa të komplikuara sepse po e pret tokën në një mënyrë të caktuar. Nuk është gjëja më e lehtë. Është si një marrëveshje komplekse pasurish të paluajtshme shumëzuar me një mijë. Por është një marrëveshje që do të kishte ndaluar vrasjen e mijëra jetëve çdo muaj”, tha Trump.
Trump shtoi më tej se Shtetet e Bashkuar kanë shpenzuar afërsisht 350 miliardë dollarë në ndihmë të Ukrainës dhe në këmbim mori mineralet e rralla. Gjithashtu saktëson se Amerika po i shet armë Europës me çmim të plotë dhe më pas ata i dërgojnë në Kiev.
