Ambasadori i Shteteve të Bashkuara të Amerikës në Prishtinë, Philip Kosnett, ka thënë se i vjen mirë që nesër në Kuvendin e Kosovës, do të mbahet seanca për votimin e mocionit të mosbesimit ndaj Qeverisë së Albin Kurtit.
Ambasadori ka pohuar se është e rëndësishme që të gjitha institucionet e Kosovës ta respektojnë Kushtetutën.
“Jam i kënaqur të shoh që Kuvendi do të mbajë nesër seancën për votimin e mocionit. Siç i kam thënë kryeministrit sot, është e rëndësishme që Kuvendi dhe të gjitha institucionet e Kosovës të respektojnë Kushtetutën”, ka shkruar Kosnett në Twitter.
Menjëherë i dërguari Special për dialogun Kosovë-Serbi nga Shtëpia e Bardhë, Richard Grenell, ka ripostuar deklaratën e Kosnett në “Twitter” ku tha se ishte i kënaqur që po mbahet kjo seancë, duke treguar qëndrimin në të njëjtën linjë. /e.s/
