Nga Spartak Ngjela
Asnjë krizë nuk ka Ballkani Perëndimor sot, me përjashtim të rimarrjes së të drejtave të dhunuara të shqiptarëve.
Dhe shqiptarët janë në bashkimin e madh të etnisë së tyre: si gjuhë, si traditë dhe si histori.
l.
Që prej afër dy shekujsh çdo genocid, çdo luftë, çdo vrasje masive, të gjitha raprezaljet kundër popullsive civile në Ballkanin Perëndimor, janë bërë nga sllavët dhe grekët kundër shqiptarëve. Këtu bën përjashtim vetëm çështja e gjakderdhjes së Bosnjës në dhjetëvjetshin e fundit të Shekullit që kaloi.
Tani po dëgjojmë predikimet paqësore dhe humaniste nga Presidenti i Serbisë që nuk ka çfarë të bëjë.
Ka dy shekuj që këta dy fqinjë kanë dashur fshirjen e Shqipërisë dhe shqiptarëve nga harta e Ballkanit, në një kohë që një pjesë të madhe territorit të tyre e kanë fituar duke vrarë fizikisht dhe shpërngulur shqiptarët.
Një pasion makabër kundër gjuhës shqipe ka qënë kudo kjo histori e trishtë shqiptare: në Stamboll; në Beograd; në Shkup dhe në Athinë.
Nuk ka vuajtje më të madhe historike se vuajtja shqiptare, se shqiptarët nuk patën asnjë mik deri sa iu doli përkrah Austo-Hungaria. Të gjithë kundër. Por ishte shumë pak.
Kur filloi shpërbërja e Perandorisë Osmane, shqiptarët u tradhëtuan nga të gjithë: që nga halldupët e Stambollit e deri të fuqitë e mëdha europiane. Dhe prapëseprapë mbijetuan që të fillonin eskalimin e tyre në shekullin e XXI.
Kot lodheni sot, o të mjerë, brenda dhe jashtë Shqipërisë! Eskalimi drejt bashkimit kombëtar shqiptar është i pandalshëm.
Shqipëria shkoi deri në zgrip të shuarjes së saj nga politika perëndimore kundër saj dhe në favor të fqinjëve. Ky ishte gabimi që po ndreqet.
Prandaj tani po spikat e kundërta: gjithçka që po ndodh në Ballkanin Perëndimor është rimarrja e të drejtave të mohuara të shqiptarëve.
ll.
Po krerët që i kanë drejtuar shqiptarët?
Shumica kanë qenë të shitur në Beograd ose në Athinë: blejini! Urdhëronin me forcë mbretër dhe kryeministra; se e dinin që shiteshin. Dhe kjo një rrugë e gjatë që erdhi deri në dy dekadat e fundit të historisë shqiptare: blejini! Kjo ka qenë metoda që filloi me Esad Toptanin. Blejini! dhe ende vijon…
Por sot ka ardhur fundi. Politika anglosaksine e para e quajti gabim prishjen e Austro-Hungarisë dhe krijimin e Jugosllavisë; domethënë të gjithë hordhizmin antishqiptar e ka quajtur një gabim historik.
Po tani?
Gjithçka ndryshe: tani filloi të zbardhet historia e Shqipërisë dhe shqiptarëve nga politika dhe shkenca amerikane.
Shqiptarët janë sot domosdoshmëri në politikën globale të Perëndimit dhe sidomos të Uashingtonit.
Mbrojtësi një shekullor i të drejtave të shqiptarëve: USA, tani është e kundërta e atyre që kanë dashur të shfarosin shqiptarët.
Po krerët shqiptarë sot?
Kundër janë një pjesë- ajo e korruptuara që do të penalizohet nga reforma e nisur në drejtësi – por nuk kanë forcë. Kanë humbur në rrugën qorre që morrën vetë, se nuk e besuan që do merrte fund mbrojtja ndërkombëtare e fqinjëve antishqiptarë kundër jetës së përbashkët të shqiptarëve në një shoqëri të gjerë të etnisë së tyre.
Ja, kjo është e vërteta që po i bie anash dhe indirekt politika e Beogradit, e Athinës dhe aleatit të tyre moskovit.
