Ambasada e SHBA në Tiranë është treguar e ashpër pasditen e së martës përmes një deklarate drejtuar opozitës shqiptare.
Duke e etiketuar si një kërcënim nga PD dhe LSI, Uashingtoni shprehet se djegia e mandateve minon demokracinë dhe saboton përparimin e vendit.
Nga ana tjetër, SHBA u bën thirrje deputetëve që t’i refuzojnë thirrjet për braktisjen e mandateve dhe të çohen mbi sherret e politikës.
Deklarata e plotë:
Një demokraci e shëndetshme kërkon një opozitë që funksionon në mënyrë konstruktive brenda institucioneve kushtetuese.
Kërcënimet nga Partia Demokratike, Lëvizja Socialiste për Integrim dhe parti të tjera opozitare për të braktisur mandatet e tyre në parlament minojnë parimet bazë të demokracisë dhe sabotojnë përparimin e rëndësishëm që Shqipëria ka arritur në zbatimin e ligjit dhe qeverisjen e përgjegjshme.
Shtetet e Bashkuara iu bëjnë thirrje të gjithë deputetëve të ngrihen mbi sherret politike, të refuzojnë thirrjet për të braktisur mandatet e tyre dhe të mbrojnë idealet dhe parimet që janë me rëndësi thelbësore për çdo demokraci të fortë.
Nëse dështoni të bëni punën tuaj, do të zhgënjeni njerëzit të cilëve keni privilegjin tu shërbeni.
/a.rada
