Zyrtari i Lartë i Departamentit të Shtetit Hoyt Bryan Yee ka dhënë një mesazh të qartë për opozitën në një bashkëbisedim që ai ka zhvilluar me gazetarët, pas takimit me kryeministrin Rama dhe pak para se t’i drejtohej selisë së PD ku pritej nga kreu i kësaj force Lulzim Basha.
Ai deklaroi se është e drejtë e çdo partie mospjesëmarrja në zgjedhje, por theksoi qëndrimin e SHBA se zgjedhjet duhet të mbahen. Po ashtu ai theksoi se çdo parti ka të drejtën e saj të mos marrë pjesë në zgjedhje duke lënë të kuptohet se, sido që të jetë vendimi i opozitës, zgjedhjet duhet të zhvillohen.
“Zgjedhjet janë më të mira kur ka përfaqësim të gjerë. Është shumë e rëndësishme që zgjedhjet të bëhen. E drejtë e çdo partie mospjesëmarrja në zgjedhje. Nëse disa parti përjashtojnë veten, ato vetëdëmtohen. Asnjë parti nuk ka përfituar nga bojkoti. Bojkoti nuk është një taktikë fituese.”, ka thënë mes të tjerash zv.ndihmës Sekretari i Shtetit Hoyt Bryan Yee.
Për herë të parë, Yee ka thënë se SHBA japin siguri se kryeministri Rama nuk ka një synim për të kapur zgjedhjet dhe se ata besojnë tek standardet zgjedhore.
“SHBA janë gati të mbështesin palët për të marrë pjesë në zgjedhje, por edhe pa opozitën ato do të konsiderohen legjitime e po ashtu edhe reforma në drejtësi, pa votat e opozitës”, ka thënë Yee.
Po ashtu, zyrtari i lartë i DASH ka deklaruar se zgjedhjet do të njihen nga SHBA nëse ato çertifikohen. Por, gjithsesi ai u ka bërë thirrje palëve të ulen për të gjetur konsensus, duke vlerësuar paketën McAllister si një mundësi për kompromis.
“Ka ofertë të mirë nga McAllister e cila duhet të pranohet nga partitë. Nëse zgjedhjet çertifikohen të rregullta ne do t’i njohim”, tha ai.
Ndërkohë, Yee ka dënuar deklaratat që nxisin dhunë, referuar retorikës s♪7 ashpër nga përfaqësuesit e opozitës.
/a.m.
