Prej disa kohësh politika shqiptare është përfshirë nga debatet lidhur me kohën se kur duhet të dorëzojë detyrën Prokurori i Përgjithshëm Adriatik Llalla.
Lidhur me këtë çështje kanë reaguar edhe misionet e OPDAT dhe EURALIUS.
Në rekomandimet e dhëna, këto misione konfirmojnë se mandati i kryeprokurorit përfundon në fillim të Dhjetorit. Ky qëndrim është shprehur edhe nga mazhoranca më herët. Por opozita argumenton se Llalla duhet të qëndrojë deri në ngritjen e organeve të reja të drejtësisë.
Ndërkohë, misionet e SHBA-BE argumentojnë se mund të zgjidhet një prokuror i përkohshëm me shumicë të thjeshtë ngha parlamenti deri në ngritjen e Këshillit të Lartë të Prokurorisë.
OPDAT dhe EURALIUS theksojnë se asnjë autoritet nuk mund t’i zgjasë mandatin kryeprokurorit pasi ka skaduar.
“Në situatën që paraqitet këtu, duket se dispozitat kalimtare përcaktojnë të drejtën dhe detyrimin e Kuvendit të zgjedhë një prokuror të lartë, i cili i plotëson kërkesat e neneve 22 deri 27 të Ligjit, si prokuror i përkohshëm me shumicë të thjeshtë, në prani të më shumë se gjysmës së të gjithë anëtarëve të Kuvendit. Nuk ka autoritet kushtetues ose ligjor për Parlamentin që të zgjasë mandatin e Prokurorit të Përgjithshëm aktual, mbas skadimit të mandatit të tij. Përkundrazi, ekziston një dispozitë e qartë që urdhëron emërimin e një Prokurori të Përgjithshëm të përkohshëm”,- theksohet qartë në rekomandimet e OPDAT dhe EURALIUS.
/a.m.
