Policia në Berat ka shoqëruar në komisariat një 52-vjeçar. Uniformat blu ndaluan Thimio Çobon ndërsa po udhëtonte me autobus. Pasi u mbajt për 6 orë në komisariatin e Policisë në Berat ai u la i lirë.
“Më zbritën nga autobusi pa arsye dhe më pas më liruan dhe më kërkuan falje”, thotë Çobo duke shtuar se, policia i ka thënë se bëhej fjalë për një keqkuptim.
Por, deputeti i Partisë Demokratike në Qarkun e Beratit, Genc Pollo thotë se kjo është shkelje e të drejtave të njeriut dhe sipas tij ngjarja ka prapavijë politike.
“Policia po shkel të drejta te njeriut, si mund të ndalohet një njeri pa asnjë shpjegim. Po kthehemi në kohën e komunizmit. Arrestimi i Çobos u bë për të goditur PD-në, është anëtar i saj”, tha Pollo.
Deputeti ka postuar në rrjetet sociale dy foto me të ndaluarin, duke e shoqëruar me komentin: “Me Thimio Çobon në Berat. Bëri sot 6 orë qeli sepse paskej sharë Edi Ramën!”
