Shaqiri: Te Interi nuk dinin të trajtonin dëmtimet

Xherdan Shaqiri ka zbuluar metodat e shërimit të dëmtimeve që Interi ka përdorur ndaj tij, që sipas tij nuk ishin aspak efikase dhe profesionale. Shaqiri gjatë kohës sa ishte në Inter kishte pasur probleme të mëdha me dëmtime, ndërsa ai ka treguar se njëherë klubi i kishte thënë se duhej të ishte i gatshëm për ndeshje, përkundër që ishte i lënduar, transmeton Koha.net. “Njëherë isha i lënduar dhe duhej të isha i gatshëm për ndeshjen, dhe ata më thanë se në male jetonte një shërues që bënte mrekulli. Vozita më shumë se gjysmë ore me makinë në mënyrë që të mund të trajtohesha nga një plak, por ai nuk më ndihmoi pothuajse fare. Kjo ishte arsyeja pse Stoke City ishte zgjidhja më e mirë. Këtu janë shtatë fizioterapeutë që më ekzaminojnë çdo ditë ijet, këmbët e muskujt. Çdo gjë në një mënyrë profesionale”, ka thënë Shaqiri për Blick.