Lëvizja SFIDA e kryesuar nga Gjergj Bojaxhi ka reaguar sot në lidhje me zhvillimet e fundit politike. Duke e cilësuar shtyrjen e zgjedhjeve si një pazar politik, SFIDA shprehet se partitë nuk duhet të pretendojnë më shumë se mandati që populli u ka dhënë. E gjithë tentativa për të shtyrë zgjedhjet, sipas SFIDA-s është një manovër që deputetët të zgjasin mandatet e tyre.
“Këto skema kanë në thelb vetëm ndarjen e pushtetit mbi kurrizin e qytetarëve” – deklaron lëvizja e kryesuar nga Gjergj Bojaxhi.
Deklarata e plotë
Partia SFIDA për Shqipërinë denoncon publikisht pazaret politike për të shtyrë zgjedhjet në Shqipëri. Partitë e korrupsionit dhe nepotizmit po konsiderojnë kështu të zgjasin mandatet e tyre, veprim për të cilin nuk kanë bazë kushtetuese, e për më tepër nuk kanë legjitimitet.
Mandati kushtetues mbaron në shtator dhe deri atëherë duhet të jetë zgjedhur dhe mandatuar Kuvendi i ri. Aktorët e sotëm politikë janë të gati të sakrifikojnë Kushtetutën dhe të drejtat tona që burojnë nga kjo kushtetutë për interesat personale të tyre dhe grupimeve që kryesojnë. Shqiptarët janë të neveritur me të tilla skema hipokrite që ndërtohen nën emrin e interesit publik dhe demokracisë. Këto skema kanë në thelb vetëm ndarjen e pushtetit mbi kurrizin e qytetarëve. Partitë nuk duhet të pretendojnë më shumë se mandati që populli u kanë dhënë!
SFIDA për Shqipërinë konstaton se kjo sjellje dhe këto pazare politike janë tregues i një mentaliteti diktatorial i partive të një parlamenti të kriminalizuar, të cilat tashmë kërcenojnë zgjedhjet dhe kushtetutën.
Ju bëjmë thirrje partive politike të përfshira në pazaret e reja dhe të vjetra të mos tentojnë të vjedhin demokracinë.
