Partia SFIDA e drejtuar nga Gjergj Bojaxhi është regjistruar në zgjedhjet e 18 qershorit. Lajmi konfirmohet nga vetë SFIDA e cila përmes një njoftimi shprehet se ka arritur të mbledhë firmat për t’u bërë pjesë e garës elektorale.
“Edhe pse arritëm shifrën e kërkuar nga KQZ prej 5 mijë vetësh, nuk e ndalëm mbledhjen e firmave. Kjo, sepse donim t’i jepnim mundësinë kujtdo që kishte dëshirë, që të mund të bashkonte zërin me ne për t’i dhënë një mesazh kësaj klase politike” – thuhet në njoftim.
Partia në fjalë shpreh pakënaqësinë nga klasa politike. “Jemi shumë që ndihemi të papërfaqësuar. Jemi shumë që mendojmë se problemet e Shqipërisë burojnë nga këta politikanë që kemi. Por ne mendojmë se zgjidhja është e mundur dhe ajo do të vijë nga qytetarët” – thotë SFIDA.
SFIDA për Shqipërinë do të garojë në këto zgjedhje si alternativë e vetme dhe siç thuhet në njoftim
“Kjo parti nuk ka lindur nga nevojat apo llogaritë e politikanëve, por si një organizim i njerëzve që nuk munden më dhe që duan të jenë pjesë e fillimit të fundit të kësaj klase politike” – shprehet SFIDA. /b.d
