Muaji korrik ka shënuar fluksin më të lartë të lëvizjes së udhëtarëve në Pikën e Kalimit Kufitar të Qafë Botës dhe në Terminalin e Trageteve të Portit të Sarandës.
Sipas të dhënave zyrtare, gjatë këtij muaji janë regjistruar gjithsej 138 mijë e 189 pasagjerë në hyrje dhe dalje, duke reflektuar intensitetin e sezonit turistik në jug të vendit.
Nga ky total, 67 mijë e 128 pasagjerë kanë hyrë në territorin shqiptar, prej të cilëve 28 mijë e 910 janë shtetas shqiptarë dhe 38 mijë e 218 shtetas të huaj. Ndërkohë, në dalje janë regjistruar 71 mijë e 61 pasagjerë, mes tyre 31 mijë e 15 shtetas shqiptarë dhe 40 mijë e 46 shtetas të huaj.
Edhe qarkullimi i automjeteve ka qenë i lartë gjatë muajit korrik. Në vend kanë hyrë 18 mijë e 640 mjete, ndërsa kanë dalë 19 mijë e 642 automjete.
Autoritetet bëjnë të ditur se Pika e Kalimit Kufitar Qafë Botë dhe Terminali i Trageteve në Portin e Sarandës kanë operuar me kapacitet të plotë gjatë gjithë muajit, në bashkëpunim me agjencitë private. Kjo ka mundësuar përballimin e fluksit pa vonesa të konsiderueshme apo problematika në përpunimin e udhëtarëve dhe mjeteve.
Të dhënat tregojnë se edhe këtë verë, Qafë Bota dhe Porti i Sarandës mbeten ndër pikat më të rëndësishme të hyrje-daljeve në jug të Shqipërisë, duke shërbyer si porta kryesore për turistët dhe emigrantët gjatë sezonit veror.
