Pas vizitave të punës që ministri i Shëndetësisë, Ilir Beqaj, ka kryer në disa nga qendrat shëndetësore bregdetare në vend, gjatë ditës së djeshme, ai ka kryer një tjetër takim pune në Njësinë e Transportit Mjekësor me helikopterë në kryeqytet.
Ministri Beqaj pohoi se gjatë dy muajve të fundit numri i misioneve të fluturimit nga Njësia e Transportit Mjekësor me Helikopterë është rritur ndjeshëm, ku vetëm javën e fundit të korrikut, janë realizuar mbi 13 misione, duke u ardhur në ndihmë pacientëve në gjendje të rëndë dhe personave të cilët janë përballur me aksidente të rënda automobilistike.
“Praktikisht, në periudhën e verës kemi pasur më shumë nevojë për fluturime dhe vetëm javën e fundit të korrikut kemi 13 misione me rreth 22 orë fluturimi, gjë që tregon se ne i jemi përgjigjur të gjitha nevojave për të sjellë në kohë optimale raste të rënda në Spitalin e Traumës, apo edhe të sëmurë të tjerë për urgjenca kardiake apo cerebrale vaskulare,” tha Beqaj.
Sipas shefit të Njësisë së Helikopterëve, Albert Xhafaj, disa prej fluturimeve kanë pasur për qëllim edhe transportimin e mjekëve të Spitalit të Traumës, të cilët kanë dhënë asistencën e specializuar në spitalet e jugut për shkak se numri i pacientëve që kanë pasur nevojë ka qenë i lartë.
Nga ana e tij, Drejtori i Përgjithshëm i Qendrës Kombëtare të Urgjencës Mjekësore, Skënder Brataj, theksoi se, tashmë i gjithë personeli i kësaj njësie, por edhe mjekët, janë dukë u trajnuar në mënyrë që ndihma e parë t’i jepet pacientit edhe gjatë rrugëtimit. Sipas tij, në disa raste është dashur që të transportohen edhe dy pacientë me një fluturim, në mënyrë që shërbimi shëndetësor i specializuar të përfitohet në një kohë sa më të shpejtë.
Sipas të dhënave nga Njësia e Transportit Mjekësor me Helikopter, gjatë këtij 6 mujori jane kryer rreth 200 misione, 710 fluturime, e përkthyer në 190 orë fluturimi.
