Ky sezon veror ka nisur me ulje çmimesh në mënyrë drastike nga të gjithë operatorët në plazhin e Durrësit. Në konkurrencën e madhe midis plazheve dhe operatorëve turistikë, nga Shëngjini, Velipoja, Durrësi, Vlora dhe deri në Sarandë, “kryeqyteti” i numrit të pushuesve, Durrësi, ka fituar për sa u përket çmimeve me të cilat konkurron.
Pushues të mbërritur nga e gjithë diaspora, madhe edhe nga SHBA-të, kanë pohuar për “Gazeta Shqiptare” se çmimet e akomodimit në banesa dhe në hotele janë mjaft të leverdisshme e të pakrahasueshme me asnjë plazh tjetër në vendin tonë. 10 euro në natë, është çmimi për një banesë në qendër të plazhit. 7 euro fjetja në hotele të tjera, ndërsa në hotelet e certifikuara (me suita) çmimet variojnë nga 30 deri në 50 euro. Por, në këto hotele prenotimet janë bërë shumë kohë më parë dhe nuk gjen dhoma të lira deri në 15 shtator.
Në të gjithë zonën e plazhit të Durrësit, nga “Ura e Dajlanit” deri tek “Iliria”, banorët anës rrugëve të ofrojnë çelësat e banesave të tyre, të mobiluara e me kushte shumë të mira. Ndërkohë që, sipas operatorëve turistikë, punimet që po bëhen në zonën e plazhit e në rrugë nga bashkia kanë ndikim të padiskutueshëm për higjienën e pastërtinë.
PUSHUESIT
Temperaturat e larta të ditëve të fundit kanë bërë që shumë banorë nga Tirana të dynden drejt plazhit të Durrësit. Janë kryesisht familjarë me fëmijë të vegjël që kanë mundësinë që me pak shpenzime të bëjnë pushime në plazhin e madh të Durrësit. “Jemi nga Tirana. Më mirë se në Durrës nuk ka, sidomos për fëmijët. Të vegjlit mund të lahen në det. Në Tiranë është shumë vapë”, tha një pushuese. Ndërsa, disa pushues të tjerë u shprehën se “në plazhin e Durrësit ka kushte të favorshme, çmime të lira dhe komoditet”.
Edhe pushuesit e ardhur nga Kosova janë të kënaqur me atë që ofron plazhi më i madh në Shqipëri. “Jemi nga Kosova. 20 euro nata është çmimi në hotel. Janë çmime të volitshme për të gjithë në këtë stinë”, tha një pushues nga Peja. Ndërsa, Ahmet Shaqiri nga Prizreni, i cili ka mbërritur në Durrës së bashku me bashkëshorten për ca ditë pushime, pohoi se “kemi një shtëpi komode te Hekurudha, të pastër, të bukur, me bahçe dhe ujë pa ndërprerje. Pagesa është 10 euro në natë, shumë mirë dhe shumë lirë”. Kurse një shqiptar nga Maqedonia, i cili ka mbërritur pas 20 vitesh në Durrës nga Ilinoisi, u shpreh se “çmimet janë shumë të mira, klima e mirë, por duhen përmirësuar ca shërbime”.
ÇMIMET
“Në plazhin e Durrësit një kafe varion nga 60 deri 70 lekë të reja; një sanduiç 100 deri në 130 lekë të reja, ndërsa 2 shezlona 200 deri në 300 lekë të reja. Të tilla çmime nuk i gjen në asnjë vend tjetër, dhe kushtet janë të mira”, thanë pushuesit.
Disa prej tyre pohuan se, pavarësisht çmimeve që janë më të leverdisshme se në plazhet e tjera, ka ende punë për të bërë, pasi një sërë shërbimesh duhen përmirësuar, e sidomos në drejtim të pastërtisë e të higjienës. Pushuesit deklaruan se është problem parkimi i makinave, pasi në rrugën kryesore të plazhit është duke u punuar. Më herët, kreu i Bashkisë së Durrësit, Vangjush Dako ka deklaruar se në fillim të muajit korrik dhe në gusht do të ndërpriten punimet.
BW/d.i.
