Temperatura e lartë dhe shumë rezistente e gripit të këtij sezoni ka shtuar fluksin e vizitave në të gjitha qendrat shëndetësore. Mbi 150 ka shkuar numri i pacientëve të vegjël që kërkojnë çdo ditë në ndihmën e mjekëve pediatër pranë qendrave në lagje, shkruan A2 CNN.
Edhe dhomat e mjekëve në këtë sezon virozash nuk janë asnjëherë bosh. Thuajse të gjithë rastet janë të ngjashëm, fëmijë të lodhur nga temperatura e lartë, rezistent edhe që zgjat me ditë. Për drejtuesit e Shëndetit Publik nuk kemi të bëjmë me një situatë të pazakontë. Silva Bino, shefja për sëmundjet infektive në ISHP thotë se jemi në sezonin e gripit dhe infeksioneve të tjera respiratore, ashtu si të gjitha vendet e Europës.
Dominon gripi i tipit A dhe nënvarinti i tij AH3N2, ndaj të cilit popullata është më pak e imunizuar, pasi vitet e fundit mbizotëronteAH1N1. Ekspertët thonë se ka ende kohë për vaksinimin e popullatës ndaj gripit, e cila siguron mbrojtje edhe ndaj tipit A në qarkullim.
Ministrja e Shëndetësisë ka mbledhur strukturat shëndetësore në lidhje me masat për të përballuar vizitat dhe urgjencat nga epidemia e gripit. Zyrtarisht raportohen mbi 19 mijë të prekur në javë por shifrat janë shumë më të larta se kaq. Ndërkohë edhe në spitale janë rritur urgjencat dhe shtrimet nga komplikacionet e gripit. Ndërkohë piku i epidemisë pritet në dy javët e ardhshme me raste më të shtuara në të gjitha grupmoshat.
