Përse është tërheqës krimi? Kjo ishte tema e debatit në emisionin “Java në RTSH” të premten në mbrëmje, ndërsa të ftuar ishin pedagogu Ylli Pango, aktivistja Sevim Arbana dhe gazetarja Ilda Bejleri.
Sipas Arbanës fillimi i viteve `90 i shtyu shqiptarët të mendonin vetëm për sigurimin e sa më shumë të ardhurave. Ajo u shpreh se të rinjtë, si atëherë edhe sot, janë në kërkim të parave me çdo kusht. Kjo i bën ata që të frymëzohen nga bota e krimit.
“Shqiptarët e braktisën moralin dhe humanizmin në kërkim të parasë me çdo kusht. Unë mendoj se gjatë komunizmit fenomenet negative nuk ishin prezentë për shkak të frikës dhe jo të moralit. Në Shqipërinë e sotme gjërat janë vështirësuar akoma më shumë pasi vetë politika është ajo që ne e quajmë malavita” – tha Sevim Arbana në studion e emisionit “Java në RTSH”.