Kosova ka shumë sfida përpara rrugës së saj drejt BE-së, siç janë Gjykata Speciale, luftimi i korrupsionit, e shqetësues është fakti se aq shumë kosovarë po i bashkëngjiten Shtetit Islamik, ka thënë në një intervistë për gazetën “Zëri”, njohësi i politikave, zhvillimeve dhe konflikteve në Ballkan, analisti amerikan Daniel Serwer. Opozita ka të drejtë për kundërshtimin dhe kërkesat e saj, por nuk ka të drejtë të bllokojë funksionimin e institucioneve të Kosovës.
Kosova e pranoi Planin e Ahtisarit si bazë për pavarësinë dhe duhet ta zbatojë me besnikëri. Dhuna dhe përçarja më neveritin, këto nuk duhet të kenë vend në një institucion demokratik. Kështu ka thënë në një intervistë për gazetën “Zëri”, njohësi shumë i mirë i politikave dhe zhvillimeve qysh nga konfliktet e fundit, analisti amerikan Daniel Serwer.
Ai njeh shumë mirë situatën në vend, dhe thotë se Kosova s’duhet të mbetet e izoluar, por ka si shqetësim gatishmërinë e kosovarëve për t’iu bashkuar Shtetit Islamik. Thotë se Kosova dikur ishte sekulare dhe se sot kjo po ndryshon. Sa i përket luftimit të korrupsionit nuk është shumë i impresionuar me misionin e EULEX-it, por mendon se Kosova s’ka alternativë tjetër.
Gjykatën Speciale e sheh si veprim të domosdoshëm, duke thënë se fakti është se krimet janë kryer kundër serbëve dhe shqiptarëve pas luftës së vitit 1999 në Kosovë.
