Mbrojtësi i Skënderbeut, Bajram Jashanica, ka rezultuar pozitiv në kontrollet antidoping dhe mund t’i mungoje Skenderbeut per nje kohe te gjate.
27-vjeçari nga Prishtina, i cili ka luajtur 145 ndeshje me fanellën e klubit korçar, është zbuluar pozitiv pas kontrolleve të kryera në shtator, pas ndeshjes Skënderbeu – Young Boys në Ligën e Evropës.
Mësohet se tashmë në zyrat e klubit korçar ka mbërritur edhe e-maili zyrtar që njofton Skënderbeun, por edhe Federatën Shqiptare të Futbollit, në lidhje me substancën e ndaluar që është përdorur nga Jashanica, i cili pezullohet për dy vite.
Sipas rregullores në kupat e Evropës, klubet janë të informuar se pas çdo takimi dy lojtarë me short të rastësishëm i nënshtrohen testit antidoping.
Në dy pjesëmarrje në fazën e grupeve, Skënderbeu nuk kishte pasur asnjë rast pozitiv, deri tani, sepse nga UEFA ka ardhur njoftimi se Jashanica ka pasur një masë jashtë normales të substancës Prednisolut, ose Prednisolon.
Bëhet fjalë për një glukokortikoid (steroid) që jepet vetëm me recetën e mjekut. Është një substancë që përdoret për të ndihmuar në shërimin e inflamacioneve në zona të ndryshme të trupit, ndërkohë që përdoret edhe për kurimin e problemeve të ndryshme, si enjtja e goditjeve apo plagëve. Problemi është se kjo substancë është në listën e medikamenteve të ndaluara WADA, Agjencia Botërore Anti-Doping, ndaj pezullimi është i paevitueshëm.
Duke qenë se ka rezultuar pozitiv më 28 shtator 2017, tashmë Jashanica do të mungojë deri në fund të vitit 2019, që është një lajm i tmerrshëm për të dhe për Skënderbeun.
Jashanica është në kulmin e karrierës dhe në moshën 27-vjeçare është bërë një titullar fiks edhe te Kosova, ku ka luajtur 4 ndeshje nga minuta e parë vjeshtën e shkuar.
