Nga Mentor Kikia
Shqipëria nuk përbën ndonjë lajm ndërkombëtar kur ulet apo ngrihet ekonomia, as për ndonjë çështje tjetër të brendshme me karakter politik, social apo shkencor. Vetëm kur morëm armët në 1997 dhe kur plasi bumja e Gërdecit ishim lajm i parë në disa media të mëdha. Por mediat na e varin edhe kur vjen puna tek çështjet e terrorizmit, ndaj dhe qeveria e nuhati mirë këtë punë kur shpalli futjen e “lëndës” fetare në shkollë, për të luftuar ekstremizmin e terrorizmin. Dhe vërtet u bëmë lajm i mirë deri në Amerikë. Unë dua ta përsëris se kjo nuk do të sjellë asgjë në tërësinë e mjedisit fetar në Shqipëri. Sepse, e para, ne nuk dallohemi për shoqëri ekstremiste, dhe e fundit, nuk janë padituritë ato që nxisin tërrorizmin. Por është shpërdorimi i fesë pikërisht nga ata që e njohin shumë mirë atë. Se, të ishte kështu, do të kishim futur edhe një lëndë për drogën, edhe një për vjedhjet, për vrasjet dhe do të ishim një shoqëri ideale. Ndërsa mësimin, qoftë edhe përciptazi, të historisë apo marrjen e nojurive bazike mbi fenë, e shikoj si problem në dy drejtime:
Së pari; Mbingarkesën e nxënësve me njohuri krejtësisht pa vlerë, pasi boll janë ngarkuar kurrikulat se po i shkatërrojmë fëmijët, kur i detyrojmë të mësojnë histori arti dhe matematikë të avancuar edhe atyre që shkojnë në shkollë për marangoz.
Së dyti: Përplasjen e njohurive(nëse do të ketë të tilla). p.sh: Ç’tu themi nxënësve që njeriu u “prodhua” nga perëndia apo nga evolucioni natyror? Do të thoni që as evolucionit nuk i është bërë oponencë dhe e kemi besuar aforfe. Por, të paktën që bota rrotullohet, është konfirmuar, që tërmetet nuk i shkakton zoti nga zemërimi me njeriun, por u shkakton lëvizja e pllakave tektonike, edhe kjo është provuar. Edhe që vullkanet nuk i shkakton Perëndia e egërsuar, edhe kjo dihet.
Institucionet fetare i kanë të gjitha mundësitë që këto njohuri, ti përhapin me modesti vetë, jashtë shkollës dhe pa ua lënë në dorë ekstremistëve që predikojnë nëpër bodrume.
