Nga Edvin Kukunja
Opozita e ka seriozisht me reformën në drejtësi! Siç e ka seriozisht pak a shumë me të gjitha çështjet në të cilat dështoi me sukses ndërsa kishte në duar qeverisjen e vendit. Halimi theksoi, para mbledhjes së parë të Komisionit Parlamentar për Reformën në Drejtësi, se opozita nuk do të pengonte që procesi të përparojë, që do të bënte çmos që raportet e përpiluara nga ekspertët të adresoheshin sa më parë pranë Komisionit të Venecias, por, e theksoi dhe këtë, opozita ka nja agjendë të vetën për këtë çështje.
Se cila është kjo agjendë tashmë të gjithë e dimë! E shohim të gjithë se si Këshilli i Lartë i Drejtësisë, vazhdon të mbetet peng i një Presidenti që nuk humbë asnjë rast për të penguar dhe thjesht marrjen e disa masave si rrjedhojë e një adminstrimi normal të sistemit gjyqësor, siç e pamë me emërimet e munguara të krerëve të disave prej gjykatave më të rëndësishme të vendit kur Halimi me shokë kishin frerët e qeverisjes së vendit. E kjo jo sepse nuk kishin kë të vinin por, në disa raste, prisnin të piqeshin e të “mbushnin moshën” “foshnjarakët” e preferuar në agjendën e tyre për drejtësinë shqiptare.
Pra, dhe sot, treguan që e kanë seriozisht! Bënë atë që dinë të bëjnë më mirë! Të ulërasin dy-tre fraza që i kanë mësuar përmendësh e të ikin e të “braktisin” premtimet e tyre që nuk i kanë për gjë t’i japin e t’i tërheqin aty për aty.
Cilat arsyet? Mund të jenë të shumta! Duke shkuar nga “agjenda” e tyre për drejtësinë (e për vendin) deri tek mungesa e një alterntive të mirëfilltë për çështjen, ose, dhe pse jo, dëshira për të mos i shtyrë një ditë pushimet e shumë merituara. Helbete, korriku iku dhe gushti nuk është muaji më i përshtatshëm për të punuar. Le që përsa u përket punëve, dhe sidomos punëve të bëra, Halimi dhe shokët e tij nuk është se na treguan ndonjë zell a dell të madh kur kishin mundësinë të bënin diçka, pak vite më parë, e thjesht nuk bënë.
Sistemi i drejtësisë është një plagë që, përveçse një detyrim kundrejt angazhimeve të rrugëtimit evropian, është një çështje tashmë një emergjencë urgjente për shoqërinë. Mesa duket Halimit vendimet e disa gjykatësve, të lëshuara pa kurrfarë përgjegjshmërie as institucionale e as qytetare, si të ishin të pëgëra fluturakësh mbi kryet tona, dhe dëmet e tyre “kolaterale”plot gjak e dhimbje, nuk ia prekin aspak “agjendën” opozitare për reformimin e drejtësisë. Gjynah! Për vendin e jo për Halimin dhe shokët e tij.
