Presidenti Vuçiç tha nga Davosi se Serbia do të vazhdojë të punojë me shpejtësi për armatosjen dhe pajisjen e ushtrisë së saj. Vuçiç tha se aktualisht Serbia renditet e 63-ta në renditjen “Global Firepower Index”, ndërsa me investimet e reja ushtarake synon 50 vendet e para.
“Ne duam ta mbrojmë fuqishëm sovranitetin e vendit tonë, duke bërë investime të mëdha në ushtri, për sigurinë dhe paqen për qytetarët tanë, për të penguar çdo agresor të mundshëm. Kroacia ka një ushtri shumë të fortë, ata meritojnë një vend më të mirë se i 74-ti. Askush që është serioz nuk duhet ta nënvlerësojë këtë. Ne e bëmë këtë rreth 30 vjet më parë. Ne nuk jemi budallenj sot”, tha Vuçiç.
Vuçiç tha se pret që presidenti i Azerbajxhanit, Ilham Aliyev, të vizitojë së shpejti Serbinë për të nënshkruar një marrëveshje për ndërtimin e një termocentrali me gaz.
“Do të jetë një termocentral me gaz në afërsi të Nishit, vende të reja pune në Serbinë jugore.
Do t’i shtojmë 500 megavat sistemit tonë energjitik nga marrëveshja me Azerbajxhanin, që ata të na furnizojnë gaz përmes interkonektorit bullgar që ne ndërtuam së bashku me evropianët”, shtoi ai.
Vuçiç tha se aktualisht ka probleme të mëdha në nivel global dhe se çdo vend ka kutinë e vet të Pandorës, por çështja e Kosovës ishte kutia e parë e Pandorës.
Ai beson se marrëveshja paraprake mes Gazprom dhe kompanisë hungareze MOL për shitjen e aksioneve të tyre në kompaninë serbe të energjisë është e mjaftueshme që amerikanët të bëjnë lëshime.
