Presidenti i Serbisë Aleksandër Vuçiç paralajmëroi të dielën se Beogradi do të ndryshojë qasjen në dialogun me Kosovën, i cili ndërmjetësohet nga Bashkimi Evropian.
“Nuk do të jetë e lehtë, para së gjithash për popullin tonë në Kosovë. Por do të ketë ndryshime në doktrinën dhe qasjet tona. Nuk do të na vënë më para faktit të kryer. Ne do të jemi gjithmonë të gatshëm për bisedime, për dialog, por qasja jonë do të jetë dukshëm e ndryshme, sepse ne nuk jemi më të tillë budallenj”, tha presidenti i Serbisë, Aleksandër Vuçiç.
Duke folur për anëtarësimin e Kosovës në Këshillin e Evropës, Vuçiç shtoi se pret vetëm lajme të këqija për vendin e tij.
“Unë do të shpjegoj se si na mashtruan, ku dhe si na kanë gënjyer disa të ashtuquajtur miq e shumë të tjerë, dhe kjo ka të bëjë me anëtarësimin e Kosovës në Këshillin e Evropës. Ne ua bëmë të ditur çfarë pritej nëse ndodhte kjo gjë. Ata mendojnë se kanë të drejtë ta interpretojnë marrëveshjen në mënyrë të rreme, jo në mënyrë të gabuar, por të rreme. Do të jetë shumë e vështirë për ne, sepse synimi i dikujt është që ta shtyjë popullin serb sa më larg Kosovës dhe kjo është vetëm një pjesë e asaj që po vjen”, u shpreh Vuçiç.
Kosova shpreson se do të mund të anëtarësohet në Këshillin e Evropës, pasi më 27 mars është thirrur një takim i jashtëzakonshëm i Komiteti Politik të kësaj organizate. Vendimi erdhi pasi kryeministri Albin Kurti njoftoi se do t’i kthehet toka Manastirit të Deçanit, që ishte një nga 3 kërkesat për anëtarësimin e Kosovës në KiE.
/a.r
