E dënuan komunistët, por së fundmi, një gjykatë në Beograd rehabilitoi liderin çetnik Dragoljub Mihailovic, i cili u ekzekutua për tradhti dhe bashkëpunim me nazistët në vitin 1946, pas seancash dëgjimore që theksuan ndarjet e vjetra në Serbi. Mihailoviç ka qenë një armik i njohur dhe i shqiptarëve dhe i luftës së tyre për pavarësi, paçka se disa krerë shqiptarë kanë bashkëpunuar me të.
Ditët e fundit, Gjykata e Lartë në Beograd rehabilitoi Mihailovicin, i njohur si Drazha, duke anuluar vendimin e kohës së komunizmit nga viti 1946, i cili e dënoi atë me vdekje. Gjykata vendosi se gjyqi i Mihailovicit pas Luftës së Dytë Botërore ishte “politik dhe ideologjik” dhe bëri korrigjime serioze ligjore. Ajo tha gjithashtu se gjyqi nuk ishte i drejtë sepse ai nuk kishte kontakt me avokatët e tij mbrojtës dhe nuk kishte as të drejtë të apelonte. Ajo vuri më tej në dyshim vërtetësinë e provave të paraqitura në gjyq.
Si shenjë e asaj se si ky rast ka reflektuar ndarjet e vazhdueshme brenda shoqërisë ndërmjet adhuruesve dhe kundërshtarëve të Mihailovicit, policia ishte vendosur jashtë gjykatës për ta parandaluar ndonjë incident ndërmjet mbështetësve çetnikë dhe protestuesve anti-nacionalistë që ishin mbledhur për ta pritur verdiktin. Oliver Antic, një këshilltar i presidentit të Serbisë Tomislav Nikoliç dhe një nga ata që propozoi rehabilitimin, tha se kjo ishte një arsye për të festuar. Princi i kurorë së Serbisë Aleksandar Karadjorjevic, pretendenti aktual i fronit të rrëzuar, tha gjithashtu se kjo ishte një ditë pozitive për vendin.
Në vitin 2004, qeveria serbe miratoi një ligj, i cili i jepte partizanëve dhe çetnikëve një vend të barabartë nderi në histori, pasua nga një tjetër ligj në vitin 2006 për rehabilitimin e ish-çetnikëve.
