Kapiteni i Kosovës, Samir Ujkani ka dhënë së fundmi një intervistë për median prestigjioze spanjolle “Marca”, para sfidës që “dardanët” do të zhvillojnë me kombëtaren iberike. Gardiani 32-vjeçar ka folur për shumë gjëra, teksa nuk ka nguruar të tregojë dhe historinë e luftës së Kosovës.
“Unë kam lindur në Kosovë, e cila i përkiste Jugosllavisë në atë kohë. Në vitin 1994 kemi ikur për shkak të luftës. Arritëm në Belgjikë. Unë jam rritur atje dhe mund të zgjidhja të luaja për kombëtaren belge. Zgjodha të luaja për Shqipërinë, sepse familja ime është shqiptare e Kosovës. Të luaja për vendin tim ishte një ëndërr. Kur Kosova u bë ekip, unë menjëherë nisa t’i bëja gati procedurat për të ndryshuar kombëtare”, ka thënë Ujkani.
Portieri i cili është pjesë e Torinos, u tregoi spanjollëve, se sa anëtarë të familjes i ka humbur gjatë luftës në Kosovë:
“Kam humbur dy xhaxhallarë dhe gratë e tyre. Gruan e kushëririt tim dhe vajzën e saj. Me pak fjalë, ato janë histori të vështira që ndodhën gjatë luftës. Ne humbëm gjithçka, sepse të gjitha shtëpitë në fshat u shkatërruan, u dogjën. Familja ime duhej të fillonte nga e para”, vazhdoi kapiteni i Kosovës.
Si shpëtoi babai juaj?
“Para luftës babai im u akuzua për diçka që nuk e bëri kurrë. Ne kishim një punë të mirë, por të gjithë njerëzit që kishin punë të mirë ua morën. Për fat të mirë ishte një gjykatës serb i cili ishte një person i mirë dhe i tha: “Arratisu ik largohu, sepse ajo që vjen është luftë”. Ne ishim aq me fat që ai e dëgjoi. Më pas u larguam në Belgjikë. Por shumë të afërm nuk donin të largoheshin, sepse kjo do të thoshte të linin pas gjithçka për të cilën kishin luftuar në jetën e tyre: tokat, shtëpitë e tyre, familjen e tyre … Babai im tha që nuk i interesonte, se nuk do të rrezikonte gruan dhe djemtë e tij.
g.kosovari
