Në katër komunat në veri të Kosovës, Mitrovicë e Veriut, Leposaviq, Zveçan dhe Zubin Potok, sot u mbajtën seancat konstituive, në të cilat kryetarët e rinj nga Lista Serbe, partia më e madhe e serbëve në Kosovë, e rimorën edhe zyrtarisht pushtetin duke bërë betimin.
Analisti Ylli Hoxha e quajti kthimin e serbëve në komunat e Veriut si një lexim pozitiv nga ana e Bashkimit Evropian.
Në një lidhje të drejtpërdrejtë në edicionin qendror të lajmeve në televizionin kombëtar Vizioni Plus, me moderatoren Melisa Mehmetaj, Hoxha tha se kthimi i përfaqësuesve të Listës Serbe në krye të komunave do të prodhojë në afatgjatë tensione të reja, por në një nivel institucional.
Sa i përket zgjedhjeve më 28 dhjetor, analisti tha se rezultatet nuk do të bëjnë ndryshime të mëdha, duke shtuar se do të ketë lëvizje të vogla, të cilat, sipas tij, do të mundësojnë krijimin e një shumice të brishtë, por që nuk premtojnë stabilitet të qeverisjes katërvjeçare.
INTERVISTA E PLOTË:
Çfarë pritet të ndodhë në komunat e Veriut pas betimit të kryetarëve të rinj nga lista serbe, të cilët rikthehen në këto komuna pas më shumë se dy vjet e gjysmë?
Hoxha: E para, besoj, do të jetë një lexim më pozitiv nga ana e Bashkimit Evropian mbi atë se cila është gjendja në veri. Ndonëse në krye të komunave do të kthehen përfaqësuesit e Listës Serbe që janë instrumenti i drejtpërdrejtë i Beogradit, kjo do të prodhojë në afatgjatë, besoj, tensione të reja, por tash në një nivel institucional. Pra, unë pres që në rend të parë do të revidohen disa prej vendimeve të marra nga kryetarët shqiptarë në vitet e fundit. Mund të ketë edhe vendime të cilat i kundërvihen pikëpamjeve dhe politikave të qeverisë qendrore, të cilat mund të shkaktojnë tensione. Pra, pres që të vazhdohet përdorimi i kryetarëve të komunave, gjithësesi komunave në tërësi në veri, si instrument i destabilizimit, siç i ka përdorur më herët Republika e Serbisë.
Po cila do të jetë qasja e Listës Serbe dhe të zgjedhurve të saj me autoritetet e Kosovës, marrë parasysh që sot betimi i tyre është bërë në prani të simboleve të Kosovës?
Hoxha: Ky është një hap përpara. Besoj se një konturë institucionale është vendosur në veri dhe unë shpresoj, besoj, se ajo do të mirëmbahet edhe më tutje. Se çfarë veprime ata do të marrin, do të shihet. Kjo varet krejtësisht se sa do ta tensionojë Kosovën Beogradi dhe cila do të jetë kundërpërgjigjja e Bashkësisë Ndërkombëtare kundrejt këtyre iniciativave. Do të jetë një proces besoj i vështirë politik me mundësi tensionesh, në të cilin roli i Bashkësisë Ndërkombëtare do të jetë jetik për të amortizuar marrëdhënien institucionale mes komunave në veri dhe qeverisë qendrore në Prishtinë.
Qytetarët e Kosovës do t’i drejtohen sërish kutive të votimit në 28 dhjetor. Si e shihni ju konfigurimin politik pas këtyre zgjedhjeve? A do të arrijë Vetëvendosje të bëjë qeverinë apo gjasat janë që të shkojë në opozitë?
Hoxha: Kemi pasur një rezultat baraz mes dy taboreve në zgjedhjet e fundit, ku asnjëra palë nuk arriti dot ta ketë shumicën vetë. Nuk jam shumë i bindur se rezultatet e ardhshme do të bëjnë ndonjë ndryshim të madh. Mund të ketë lëvizje të vogla, të cilat ndoshta do të mundësojnë krijimin e një shumice të brishtë, por nuk premtojnë stabilitet të qeverisjes katërvjeçare. Nëse pikëpamja është ajo që kemi pasur në 12 muajt e fundit, pra pikëpamja e polarizimit, kur njëra palë do ta bëjë qeverinë vetë domosdo dhe nuk ka aftësi bashkëpunimi me të tjerët. Mendoj se është shans ideal që në këtë fushatë të modifikohen qëndrimet. Kjo në mënyrë që të mendohet për një qeverisje më të gjerë, e cila prodhon institucione stabile brenda një konteksti gjeopolitik botëror mjaft të vështirë, në të cilin Kosova mund të bëhet ndoshta pjesë e bisedimeve pa qenë fare aktive në to.
