Drejtori i së ashtuquajturës Zyra për Kosovën në qeverinë e Serbisë, Marko Gjuriq, i është përgjigjur kryeministrit të Shqipërisë, Edi Rama, i cili ka thënë se “Kosova dhe Shqipëria do të bashkohen nëse nuk hyjmë në BE”.
Marko Gjuriq ka thënë se “askush nuk duhet të luajë dhe përpiqet ta ringjallë idenë fashiste të Shqipërisë së Madhe – ide e varrosur e Enver Hoxhës”, shkruan Tanjug, transmeton Gazeta Express.
“Unë do të doja ta informoja Edi Ramën dhe Hashim Thaçin se Enver Hoxha kishte vdekur me idenë e Shqipërisë së Madhe, ide e varros përgjithmonë, që i takon pjesës së errët të së kaluarës fashiste të kësaj pjese të Gadishullit tonë Ballkanik”, tha Gjuriq në një deklaratë për media.
Kryeministri i Shqipërisë, Edi Rama, ka thënë se bashkimi i vendit të tij dhe Kosovës nuk mund të përjashtohet në qoftë se perspektivat e hyrjes së rajonit në BE vazhdojnë të zbehen.
I pyetur në lidhje me bashkimin e Shqipërisë dhe Kosovës, Rama për “Politico” në Bruksel, tha se nuk ishte dëshira e tij, por kjo është një alternativë e mundshme për dyert e mbyllura të BE-së, citohet Express. (b.an)
