Serbët i besojnë më shumë presidentit rus, Vladimir Putin, sesa çdo lideri tjetër, përfshi edhe të vetëve, dhe më me dëshirë do të lidheshin politikisht e ekonomikisht me Rusinë sesa me Bashkimin Evropian, ka bërë me dije një sondazh i ri.
Sondazhi me mbi 1,100 të rinj serbë është kryer nga revista “New Serbian Political Thought”, [NSPM] ndërsa janë pyetur se cilit lider i besojnë më së shumti.
Kryeministri serb, Aleksandar Vuçiç, ka dal të jetë politikani më i besueshëm serb me 34.6 të votave, raporton Koha.net.
Megjithatë, presidenti rus Putin ka gëzuar besimin më të madh të respodentëve, të cilët janë pyetur edhe për liderin e huaj më të besueshëm. Sipas sondazhit, Presidentit Putin i besojnë 36.1 për qind e serbëve, shumë përpara kancelaren gjermane Angela Merkel, që doli të ishte lideri i dytë më i besueshëm i huaj me 7.3 për qind. Kryeministri grek, Alexis Tsipras, doli i treti me 1.6 për qind ndërsa presidentit amerikan, Barack Obama, i besojnë vetëm 0.5 për qind e serbëve.
Gazeta serbe “Blic” ka folur me sociologun Neven Cveticanin për të sqaruar rezultatet. Ai ka përshkruar presidentin Putin si “Clint Eastwoodi politik”, që është ‘cool’, i përmbajtur dhe i vendosur. Në rast të zgjedhjes mes BE-së dhe Rusinë, respodentët sërish përkrahën idenë e unionit politik dhe ekonomik me Rusinë; 35.7 do të zgjidhnin Rusinë dhe vetëm 21.1 për qind BE-në.
