Që serbët paragjykojnë çdo gjë kundrejt Shqipërisë, kjo dihet tashmë, por mendja e tyre djallëzore i kalon caqet. Dhe këtu nuk po flasim për tifozët e thjeshtë të Serbisë apo ultrasit e saj, por për mediat, që vazhdojnë aludime nga më të ndryshmet. E fundit është ajo kundër gjyqtarit italian me famë botërore, Nicola Rizzoli, që do të arbitrojë ndeshjen e 8 tetorit Shqipëri-Serbi. Mediat në Beograd shkojnë aq larg, saqë frikësohen se Rizzoli do të ndihmojë Shqipërinë, sepse është italian dhe bashkëkombës i tij Xhani De Bazi është trajneri i kuqezinjve.
Pak e çuditshme alibia e serbëve, më saktë e mediave serbe, të cilat ashtu si edhe në ndeshjen e rrett një viti më parë në Beograd, jo vetëm që nuk u treguan aspak profesioniste, por shpifën deri në atë pikë që dronin e kishte hedhur vëllai i kryeministrit të Shqipërisë. Kujtojmë që Nicola Rizzoli është njëri prej gjyqtarëve më të mirë në botë, për të mos thënë më i miri dhe profesionalizmin e tij e konfirmon fakti se FIFA i besoi finalen e Kupës së Botës, Argjentinë-Gjermani. Ndërsa UEFA më parë i kishte besuar finalen e Champions League 2013, Bayern Munich-Dortmund.
Gjithashtu, Nicola Rizoli ka arbitruar edhe në shumë ndeshje të mëdha, duke treguar profesionalizëm dhe patriotizmat në këtë rast nuk kanë vend. Për të hedhur poshtë aludimin e mediave serbe ka menduar futbollisti me përvojë serb, Dushan Tadiç, i cili beson në profesionalizmin e Rizzolit, duke deklaruar: “Ai më ka gjykuar mua në Europa League dhe është një gjyqtar i mirë, kështu që nuk besoj se do të ndikojë në favor të Shqipërisë vetëm sepse Shqipëria udhëhiqet nga një bashkëkombës i tij”. (TeleSport)
