Sendet personale të ish-kancelarit gjerman, Helmut Kohl, duke përfshirë dhuratat që ai mori nga personalitete të huaja gjatë vizitave shtetërore, do të dalin sot në ankand në Hamburg.
Disa nga objektet më interesante që do të dalin në ankand janë një kuti argjendi që Kohl mori gjatë vizitës së tij te mbretëresha Elizabeth II, në vitin 1978, si dhe një medalje të artë me një portret të ish-kancelarit që ai mori në SHBA, gjatë festës së 200-vjetorit të miratimit të Deklaratës së Pavarësisë.
“Çmimi fillestar për të dyja objektet është 3,500 euro (4,135 dollarë)”, njoftoi shtëpia kryesore e ankandit “Stahl”, në Hamburg.
Gjithashtu, në shitje do të jenë edhe objekte të tjera, më të vogla dhe më pak të shtrenjta, të tilla si stilografët dhe pajisjet për pirjen e duhanit të ish-kancelarit, Kohl, i cili vdiq në qershor në moshën 87-vjeçare.
Këtë muaj, shtëpia e ankandit të artit, ”Schloss Ahlden” shiti kutinë prej ari të cigareve të Kohl për 54 000 euro, gati dyfishin e vlerës së saj të vlerësuar.
Kohl shërbeu si kancelar i Gjermanisë Perëndimore dhe më pas i kombit të bashkuar që prej vitit 1982 deri në vitin 1998.
Gjithashtu, ai njihet si një figurë kyçe në integrimin evropian pas Luftës së Dytë Botërore./b.d
