Sende personale e vepra të panjohura për publikun të impresionistit francez Claude Monet (1840 – 1926), në nëntor të këtij viti do të nxirren në ankandin në Hong-Kong, që do të organizohet nga shtëpia e ankandeve “Christie’s”.
Këto artefakte të çmueshme deri tani kanë qenë pronë e familjes së artistit të madh, thuhet në shkrimin që sot e transmeton “Koha Ditore” nga artnet.com. Pos gjësendeve të Monetit, në shitje do të jenë edhe vepra të miqve të tij, Auguste Rodin e Paul Signac, printe japoneze që kishte blerë ai e që do ta inspironin tej mase, si dhe disa fotografi të tij apo edhe objekte personale si syzet dhe një qyp kopshti.
Adrien Meyer, bashkëdrejtor i sektorit të artit impresionist e modern në “Christie’s” ka thënë se ky koleksion ka mbetur në familjen e Claude Monetit duke ruajtur jo vetëm magjinë e njeriut e të artistit, por edhe atë të një koleksionisti.Të gjitha ato që do të nxirren në ankand kanë qenë në pronësi të të birit të artistit, Michelit, i cili vdiq në vitin 1966 e gati të gjitha ia la Akademisë franceze të arteve dhe muzeut të saj “Marmotan-Monet”.
Por Michel kishte një vajzë, Rolande Verneiges, të cilën formalisht nuk e pranonte, por gjatë jetës së tij do t’i jepte ca dhurata familjare. Këtu dhurata tashti janë në ankand.
Verneiges vdiq më 2008 e tre vjet më pas Mayer do të ftohej prej pasardhësve të saj në shtëpinë familjare, ku nëpër rafte e pako kartoni do të zbulonte një thesar të çmueshëm.
Në mesin e gjësendeve ishin edhe piktura e vizatime të Monetit, të cilat për opinionin publik ishin të njohura vetëm nëpërmjet katalogëve pasi ishin në pronësi të Michelit e vendndodhja e tyre qe mister deri tani.
Aty është edhe një shembull i hershëm i serisë me pemë, shumica prej të cilave janë nëpër muze. “Tri pemë në Giverny” e vitit 1887 nga “Christie’s” është vlerësuar prej dy deri në tre milionë dollarë. Në fund të “çmimores” janë një palë syze të Monetit (1.000 deri në 1.500 dollarë) dhe qypi prej terrakote (1.000-2.000 dollarë) që shihet edhe në disa prej pikturave të njohura të tij, si për shembull në veprën “Kopshti i artistit në Vétheuil” e vitit 1880 që ruhet në Muzeun e Washingtonit.
Në koleksion janë edhe vepra artistësh të tjerë, përfshirë edhe akuarelin “Saloma” të Rodinit.“Ekspertja e veprave të Rodinit është rrëzuar nga karrigia kur e ka parë”, ka zbuluar Meyer. Kjo vepër është llogaritur të kushtojë 50 deri në 80 mijë dollarë.
Duke qenë se tregu për veprat e Monetit aktualisht është fort i çuditshëm në Azi, ankandi organizohet në Hong-Kong më 26 nëntor.
Për herë të parë do të transmetohet direkt në Paris, dhe kësisoj do të mundë të përfshihen edhe blerësit e interesuar nga Evropa.
Para kësaj, të 54 sendet do të mundë të shihen në Shengai, Pekin, Londër e New York.
Meyer ka thënë se Rolande Verneiges ishte një grua shumë “modeste dhe diskrete” dhe se e ka për nder që për herë të parë t’ia ofrojë publikut atë që ajo ka trashëguar. (b.an)
