Kandidati për kreun e PD Eduard Selami ka dy kërkesa ndaj kryetarit të “ngrirë” Lulzim Basha për vijimin e garës mes tyre.
Ai i ka kërkuar Bashës që takimet në bazë ku zhvillohet debat mes tyre të zhvillohen me dyer të hapura për mediat.
Po ashtu, Selami kërkon përmes një postimi në Facebook, që të publikohet lista e anëtarëve që do të votojnë.
Ja çfarë shkruan Eduard Selami:
Të dashur miq.
Gara për kryetar të Partisë Demokratike është në kulmin e saj. Ju falenderoj të gjithëve për mbështetjen që më keni dhënë këtë periudhë.
E kam thënë më parë se kjo garë është e pabarabartë nga ana strukturore por është tërësisht e fitueshme. Unë dua që PD t’i kthehet edhe njëherë vlerave demokratike dhe perëndimore të saj.
Për këtë, i kërkoj zotit Basha të mbajë premtimin që më ka bërë se debatet mes nesh do të bëhen të hapura për mediat dhe për publikun. Kjo nuk ndodhi në debatin e Korçës.
Së dyti, i kërkoj të bëjë publike listën e anëtarëve të Partisë Demokratike të cilët do të votojnë. Nuk ka asnjë arsye që këto lista të mbahen të fshehta, ne nuk jemi parti e jashtëligjshme. Duhet transparencë. Anëtarët e PD janë krenarë që janë demokratë dhe nuk kanë frikë që të fshehin anëtarësinë ndaj hape partinë zoti Basha!
Së bashku do ta fitojmë këtë garë dhe do dalim më të fortë.
/b.d
