Pasuri të pallogaritshme i janë sekuestruar tre ditë më parë në Tiranë biznesmenit serbo-boshnjak Damir Fazlliç. Bëhet fjalë për një shumë prej 5 miliardë lekësh të depozituara në një bankë të nivelit të dytë, 67 mijë metra katrorë në fshatin Rinia në Durrës dhe disa pasuri të tjera.
Fazlliç, i cili njihet si i afërm me Sali Berishën, Lulzim Bashën dhe Fatmir Mediun, rezulton të jetë debitor i një kredie të marrë në Union Bank. Mësohet se kredia kap shifrën e 3.3 milionë eurove dhe sekuestro i është vënë pronave të Fazllic më 13 mars të këtij viti.
Ndërkohë, më 28 Prill vendimi i Gjykatës së Tiranës është marrë për ekzekutim nga përmbaruesi Edvin Malotaj.
Damir Fazlliç ka qenë i përmendur si një ndër njerëzit më pranë familjes Berisha dhe drejtuesve të tjerë të lartë të qeverisë 2005-2013. Ai është akuzuar në vijimësi nga mediat dhe opozita e atëhershme si sekser dhe përfitues i paligjshëm i pronave të shqiptarëve.
