Sa vjen dhe qartësohet se pse po sulmohet kaq ashpër Reforma në Drejtësi dhe aktualisht implementimi i saj.
Këtë e bën të ditur pikërisht ligji për Prokurorinë Speciale (SPAK), i cili bën të ditur se do të ketë jo vetëm arrestime dhe hetime të politikanëve të korruptuar, por dhe sekuestro të të gjithë pronave që janë përfituar nga paratë e vjedhura.
Në komisionin e posaçëm të Reformës në Drejtësi ka mbërritur drafti i ndryshuar i ligjit “Antimafia”, cili është hartuar nga misioni EURALIUS.
Në ndryshim me ligjin aktual janë futur 14 vepra të reja penale, që kanë të bëjnë kryesisht me korrupsionin. Aty jepen rrugët që do ndiqen për sekuestrimin e pasurisë dhe, interesant është fakti se tani një rol të madh do të ketë Prokuroria Speciale Antikorrupsion, e cila ka në fokus zyrtarët.
Sipas ligjit “Për parandalimin dhe goditjen e krimit të organizuar, trafikimit dhe korrupsionit dhe krimeve të tjera të rënda nëpërmjet masave parandaluese kundër pasurisë”, i njohur si Ligji Antimafia, nëse vërtetohet se një pasuri është vënë përmes shpërdorimit të detyrës, korrupsionit, shkeljeve në detyrë, etj., atëherë ajo sekuestrohet. Po ashtu është përcaktuar dhe rrethi i familjarëve që preken. Disa prej veprave të korrupsionit të përfshira janë: korrupsioni aktiv në sektorin privat; ushtrimi i ndikimit të paligjshëm ndaj personave që ushtrojnë funksione publike; shpërdorimi i detyrës; shpërdorimi i kontributeve të dhëna nga shteti; përfitimi i paligjshëm i interesave; refuzimi për deklarimin, mosdeklarimi, fshehja ose deklarimi i rremë i pasurive, etj.
Familjarët që preken
Sipas ligjit më të fundit, i njohur pra si Antimafia, i cili pritet që të pësojë disa ndryshme dhe në komision, pasuria u sekuestrohet dhe të të afërmve të të akuzuarit, nëse vërtetohet se ai e ka regjistruar atë në emër të tyre. Madje rrethi është zgjeruar deri te kunetërit, vjehrri apo vjehrra. Sipas ligjit, personave të afërm të të akuzuarit që mund t’i sekuestrohet pasuria janë: bashkëshorti, fëmijët, të paralindurit, të paslindurit, vëllezërit, motrat, xhaxhallarët/dajat, hallat/tezet, nipërit/mbesat, fëmijët e vëllezërve dhe motrave, vjehrri, vjehrra, dhëndri, nusja, kunata, kunati, bashkëjetuesi, thjeshtëri, thjeshtra, njerku dhe njerka.
Rruga që do ndjekë SPAK
Në ligj janë treguar dhe rrugët që do ndiqen në rast se ka dyshime se një pasuri është vënë përmes drogës, trafiqeve apo korrupsionit. Prokurori, fillimisht nis hetimet për mjetet financiare, pasuritë, veprimtaritë ekonomike, tregtare dhe profesionale, nivelin ekonomik dhe burimet e të ardhurave të tyre, përfshirë dëgjimin e dëshmitarëve dhe ekspertëve. Verifikimet bëhen, në veçanti, nëse këta persona janë zotërues të lejeve, liçencave, autorizimeve, koncesioneve dhe të drejtave të tjera për të ushtruar veprimtari ekonomike, tregtare dhe profesionale, si dhe për të verifikuar nëse ata përfitojnë kontribute, financime ose kreditime të çdo lloji, të dhëna apo të përfituara nga shteti, ente a persona juridikë publikë, organizma ose institucione ndërkombëtare, si dhe për të verifikuar nëse pasuritë, veprimtaritë apo të drejtat pasurore janë të përligjura.
Kur prokurori zbulon se ka elementë që tregojnë se pasuria është vënë përmes krimit, i drejtohet gjykatës për të dhënë urdhër që ajo të sekuestrohet. Nëse gjykata jep vendim pro sekuestrimit, ai ekzekutohet menjëherë. Sekuestrimi ekzekutohet: Për pasuritë e luajtshme dhe shumat monetare, sipas rregullave të përcaktuara nga Kodi i Procedurës Civile për ri-zotërimin e aseteve nga debitori ose pala e tretë, sipas rastit; për pasuritë e luajtshme ose të paluajtshme me zbardhjen e masës në zyrat kompetente; për pasuritë e kompanive të organizuara për funksionimin e një biznesi, përveç mënyrës të parashikuar për çdo pasuri të sekuestruar, duke marrë edhe pasuri nga administratori, duke regjistruar masën në regjistrimin e shoqërive tregtare ku regjistrohen kompanitë; për paditë dhe aksionet, me shënim në librin e shoqërive tregtare dhe hyrjet në regjistrin tregtar.
Policia gjyqësore, pas kryerjes së formaliteteve të specifikuara në pikën 1 të këtij neni vijon me marrjen e pasurive dhe dorëzimin e tyre tek administratori i pasurive, edhe nëse kanë të drejta reale ose personale për t’i gëzuar ato./tesheshi.com/a.m.
