Sasi të mëdha kokaine ishin fshehur në konteinerët me banane me destinacion final portin e Durrësit.
Rreth 137 kilogram kokainë, drogë e klasit të parë dhe një nga më të kushtueshmet në treg, ishte fshehur në katër konteinerë që bënin transportin e bananeve nga Ekuadori drejt Shqipërisë.
Firma që kishte porositur bananet është “Alba Exotic Fruit”, me administrator Eduart Dautin, por nga hetimet e deritanishme nuk rezulton të ketë lidhje me transportin e kokainës. Ka të ngjarë që porositësit e drogës, të pikasur fillimisht nga DEA amerikane, ta kenë shfrytëzuar itinerarin e importit të frutave ekzotike për të transportuar brenda konteinerëve edhe “dërgesën” e tyre.
Operacioni policor ishte i mirëmenduar dhe që prej informacioneve të DEA-s, derisa konteinerët mbërritën në portin e Pireut në Greqi ku u krye edhe zëvendësimi i kokainës me oriz, autoritetet ishin gjithmonë një hap para trafikantëve. Në Shqipëri diçka mesa duket nuk shkoi siç duhej, dhe personi i dyshuar si porositësi Gentian Malindi, arriti të arratisej.
Në pranga ranë Altin Myslihaka 35 vjeç dhe Ardian Bega 53, njëri prej tyre punonjës sigurie në portin e Durrësit.
Ndërkohë, gjatë dëshmisë së tij para oficerëve të çështjen, personi i dytë i arrestuar, Ardian Bega, oficer sigurie në portin e Durrësit pohoi se ishte kontaktuar nga Gentian Malindi që të merrte diçka në kontejnerët me banane, brenda të cilave kishte 137 kg kokainë. Po sipas Begës, pasi Malindi kishte pikasur se ishte në vëzhgim nga policia, e kishte hedhur drogën nga makina në zonën e Shkëmbit të Kavajës.
Gentian Malindi ka qenë edhe më herët i arrestuar dhe proceduar për trafikim të lëndëve narkotike.
Ai është arrestuar më parë dhe për një sasi prej 500 kilogramë hashash, që ishin transportuar nga Lazarati në drejtim të Durrësit.
Malindi ka në pronësi të tij një anije peshkimi në qytetin e Durrësti. Më herët ai është bërë pjesë e mediave, me një denoncim të tij në drejtim të policisë. Biznesmeni durrsak pretendonte se kontrollet e shpeshta të bëra nga ana e policisë po dëmtonin rëndë biznesin e tij. (Newsbomb) /l.m
