Sekretet për t’u dukur dhjetë vjet më të reja
Nëse dëshironi të dukeni më të reja duhet të ushqeheni në mënyrë të shëndetshme, të mbani një qëndrim të drejtë e të sigurt dhe sigurisht duhet të trukoheni në mënyrën e duhur.
Sapo kalohet kufiri i të tridhjetave, për shumë femra fillon shqetësimi i plakjes. Rrudhat e shprehjes dhe njollat e errëta në lëkurë, bëhen mendimi i parë i mëngjesit. Gjithsesi, për t’u dukur më të reja nuk është e nevojshme t’i drejtoheni kirurgjisë estetike!
Hapi i parë në fakt është që t’u drejtoheni “ilaçeve” natyrale dhe zgjidhjeve inteligjente, të cilat do t’ju lejojnë të tregoni më pak nga sa jeni në moshë. Ndërkohë, këshillat e plota për t’u dukur më të rinj do t’i gjeni më poshtë:
Makeup-i që rigjeneron
Sekreti i parë qëndron te makeup-i, i cili duhet të vërë në pah mollëzat tuaja. Zgjidhni “cheek lift”, teknikën e aplikimit të ruzhit, i cili i bën format e fytyrës më të bukura. Theksimin më të madh sigurisht bëjeni te mollëzat. Për sa u përket nuancave, luani me tonet e ngjyrës së pjeshkës dhe absolutisht mos përdorni më ato më të errëtat.
Prerja e flokëve: të shkurtra dhe me onde
Prerja e flokëve në mënyrën e duhur mund të ndikojë shumë mbi pamjen e një femre. Për ta bërë fytyrën më fine dhe për t’u dukur më të reja, besojini prerjes jo shumë të shkurtër të flokëve: bëjini ata me pak onde. Po ngjyra e flokëve që mund të zgjidhni për t’u dukur më të reja? Ideale janë ngjyrat e çelëta (bionde, lajthi), ndërkohë duhet të shmangni të zezën, e cila mund t’ju japë shumë egërsi në fytyrë!
Buzë me shkëlqim
Në trukun e femrave 40-vjeçare nuk duhet të mungojnë buzët me shkëlqim. Ngjyrosini ato me buzëkuq me pigmente të lehta dhe më pas vendosini shkëlqyes buzësh. Për të mos u përdorur janë produktet kozmetike mat dhe ato shumë kremoze, të cilat mund të dalin nga konturi i buzëve. Rinovoni ngjyrat që do të vendosni, ndoshta duke zgjedhur alternativat e së kuqes. Pra më mirë evitoni ato shumë të errëta ose ngjyrë kafe.
Skrabi i fytyrës
Mos harroni që të stimuloni rigjenerimin e qelizave të paktën një herë në javë. Mund të zgjidhni për shembull, një nga metodat për të pastruar fytyrën me skrab të llojeve të ndryshëm.
Limoni kundër njollave të errëta
Kundër njollave të errëta, të cilat fillojnë t’ju shfaqen në lëkurë, përdorni një “ilaç” të jashtëzakonshëm që ju gjendet në kuzhinë: lëngu i limonit do t’ju ndihmojë të eliminoni njollat dhe për të përmirësuar lëkurën.
Kremi i duhur i pudrës
Keni probleme me lëkurën? Absolutisht për t’u shmangur është efekti i kremit të pudrës (fondotinës) me ngjyrë të errët! Ndërsa për ta bërë lëkurën në dukje më homogjene, filloni me një krem me ngjyrë për fytyrën duke e shpërndarë shumë mirë në të gjithë lëkurën. Më pas, aplikoni një fondotinë, duke zgjedhur ngjyrën e duhur që vërtet ju shkon, ndërkohë që mos harroni ta spërkasni atë me një solucion kundër prishjes.
Vetulla të mirëkuruara
A mund të dukeni më e re nëse keni vetulla jo të rregulluara mirë dhe pa formë? Atëherë fillojeni nga ky veprim i vogël bukurie për t’u dukur dhjetë vjet më të reja. Forcojini vetullat duke përdorur vaj bajame dhe trumzë, ndërsa për t’i trashur përdorni një laps të posaçëm për t’i lyer.
Ushqyerja e shëndetshme
Për një lëkurë të pastër dhe të shkëlqyeshme është e rëndësishme të ndiqni një ushqyerje të shëndetshme. Mos konsumoni ushqimet e përgatitura industrialisht dhe preferoni produktet e freskëta dhe natyrale. Besojuni frutave dhe perimeve.
Duar perfekte
Mosha njihet edhe nga duart. Për t’i bërë të buta dhe të lëmuara si një 20-vjeçare, të paktën një herë në javë, futini në ujë të ngrohtë me vaj esencial livande. Si alternativë, mund të përdorni edhe vajin e ullirit. Pas dhjetë minutash, thajini dhe aplikoni një krem me bazë aloe vera.
Qëndrimi
Cila mund të jetë lidhja mes qëndrimit dhe bukurisë tuaj? Një ecje me kokën lart dhe në mënyrë të sigurt patjetër që do ta rinonte pamjen tuaj. Drejtohuni, hapni shpatullat dhe imagjinoni sikur jeni modele. Hapat tuaj duhet të jenë të lehtë dhe të vendosur në dukje. Kështu do të dukeni tepër prezente kudo që do të shkoni.
