Sekretari i Përgjithshëm i PS: Nuk do ta pranojmë që një organ jo i zgjedhur nga qytetarët, të pezullojë një ministër!

Blendi Klosi, Sekretari i Përgjithshëm i Partisë Socialiste, ka folur këtë të hënë për Euronews Albania lidhur me vendimin e Kushtetueses lidhur me pezullimin e Belinda Ballukut.

Klosi ka thënë se pas vendimit të Kryeministrit pas mbledhjes së grupit të PS-së, sipas tij forca e tyre politike do të ruajë parimin e mbështetjes për drejtësinë, por nuk do të jetë dakord për ndërhyrjen në pushtetin e zgjedhur nga populli për pezullimin e një ministri si një funksion i padelegueshëm.

“Për hir të kronikës nuk ka një vendim të Gjykatës Kushtetuese, por sa i përket raportit me PS-në, ne disa parimeve i qëndrojmë shumë fortë. E para, mbështetja për drejtësinë e re dhe organet e drejtësisë së re dhe atë çfarë drejtësia e re merr vendim. Diskutimi më i madh është për procedurat, e cila është diçka tjetër. Sa i përket vendimit të Kushtetueses, ne vazhdojmë t’i qëndrojmë fort parimit mbi të cilin pati dhe reagimin Kryeministri, raportin midis institucioneve që është drejtësia në një krah dhe ekzekutivit, për postet që janë të delegueshme. A mund të pezullohen apo jo. Vetë Parlamenti apo Kryeministri nuk u sqarua ky vendim. Ky është vendim i qartë për ne, ku ne asnjëherë nuk do ta pranojmë që një organ që s’është i zgjedhur nga qytetarët, të pezullojë një ministër, një funksion të padelegueshëm”, tha Klosi.