Për shkak të inflacionit në rënie dhe rritjes së ekonomisë dhe punësimit, Banka e Shqipërisë ka lënë të pandryshuar normën bazë të interesit në 2.75%. Lajmin e bëri të ditur guvernatori, Gent Sejko gjatë një konference për shtyp.
“Rritja e ekonomisë është shoqëruar me rritje të punësimit, të pagave dhe të vëllimit të shitjeve të biznesit, duke gjeneruar më shumë të ardhura për bizneset e familjet shqiptare. Në të njëjtën kohë, nivelet e ulëta të inflacionit kanë rritur fuqinë blerëse të këtyre të ardhurave dhe kanë incentivuar investimet e sektorit privat. Krahas këtyre faktorëve, zgjerimi i aktivitetit është mbështetur edhe nga bilancet e shëndosha të sektorit privat, besimi i konsumatorit dhe biznesit për të ardhmen, si dhe nga ambienti stimulues financiar. Vendimet e ardhshme të politikës monetare do të vijojnë të kushtëzohen nga informacioni i ri, dhe në veçanti nga analizat dhe vlerësimet mbi ecurinë e presioneve të brendshme inflacioniste”, tha Sejko.
Në mbledhjen e Këshillit Mbikëqyrës, Sejko u ndal edhe tek ulja e normave të interesit për kreditë konsumatorë.
“Ndryshimet rregullative kanë të bëjnë me uljen e mëtejshme të normës se interesit për kreditë konsumatore nga institucionet bankare dhe jo bankare dhe gjithashtu për një kufizim të komisioneve për këto kredi”, tha Sejko.
Duke ju referuar tensioneve tregtare, të javëve të fundit për shkak të gjeopolitikës, guvernatori theksoi se pasiguritë rreth parashikimeve ekonomike janë rritur.
“Pasiguritë rreth parashikimeve ekonomike janë rritur, kryesisht për shkak të zhvillimeve në ambientin e huaj. Vazhdimi i tensioneve gjeopolitike dhe pasiguria në lidhje me politikat tregtare dhe ekonomike, mund të ketë implikime të rëndësishme për ekonominë globale në përgjithësi dhe atë evropiane në veçanti”, tha Sejko.
