Pas problematikave ndër vite, duket se më në fund segmenti i shumëpërfolur Lin-Pogradec do të kompletohet, duke bërë që të kthehet në kushte normale. Autoriteti Rrugor Shqiptar ka hapur tenderin për ndërtimin e 17 km të mbetura të këtij segmenti, konkretisht nga kilometri i 4-t deri në kilometrin e 21-të, me vlerë 1 miliardë lekë, pa përfshirë vlerën e TVSH.
Në njoftimin e publikuar në Agjencinë e Prokurimeve Publike, bëhet me dije se kohëzgjatja e kontratës ose afati kohor për ekzekutimin është 24 Muaj, ndërsa afati kohor për dorëzimin e ofertave ose kërkesave për pjesëmarrje është data 7 Qershor 2017, ora 11.00.
Segmenti në fjalë përfshin Lotin 2 dhe Lotin 3 te aksit nacional Qafe Thane – Lin – Pogradec, nga km 4 në km 21+050, segment i rikonstruktuar së fundmi bazuar në kontrata të vitit 2011 dhe 2013 por që ka nevojë për riasfaltim, gjelbërim, sinjalistikë, nënkalime, etj.
Projekti i plotë për ndërtimin e këtij segmenti ka pësuar disa ndryshime duke shmangur prishjen e bunkerëve, futjen në liqen dhe duke shtuar një tunel. Ministria e Kulturës ka kërkuar që dy bunkerët të konsideruar si monumente historike, të ruhen dhe të ruhet vija e liqenit, pasi është pikë kryesore plazhi për banorët e Pogradecit dhe turistët.
Faza e parë e punimeve në këtë segment ka kushtuar 24 miliardë lekë, ndërkohë që duket se edhe në këtë sezon turistik, vizitorët do të përballen me punime në rrugë dhe vështirësi në kalim.
ma.me
