Ish-drejtuesja e Sektorit të Dekriminalizimit në Prokurorinë e Përgjithshme, Rovena Gashi, e shkarkuar nga shkalla e parë e vettingut, Komisioni i Pavarur i Kualifikimit, ka dalë sot përpara trupës gjykuese të Kolegjit të Posaçëm të Apelimit me kërkesën për t’u rikthyer në detyrë.
Seanca para KPA-së po zhvillohet me dyer të hapura, ndërsa ndihmëse në këtë proces është zgjedhur Ema Gashi, avokate nga Durrësi e njëkohësisht motra e vet subjektit të rivlerësimit. Për këtë rast, vëzhgues nga Operacioni Ndërkombëtar i Monitorimit është Theo Jacobs, që zëvendëson Mia Rosing.
Më 25 korrik të këtij viti, ish-drejtorja e Marrëdhënieve me Jashtë dhe Sektorit të Dekriminalizimit në Prokurorinë e Përgjithshme, e pezulluar muaj më parë nga kryeprokurorja Arta Marku, u shkarkua nga detyra.
Në seancën dëgjimore , muaj më parë KPK ishte shprehur se Gashi ka mospërputhje me deklarimin e pasurisë. “Rezulton se ka mospërputhje mes çmimit për blerje të apartamentit, nuk ka deklaruar burime të ligjshme për këtë blerje, që nga pagesa e parë prej 30 mijë eurosh e më pas edhe për burimin prej 50 mijë eurosh. Sipas KPK-së, janë bërë deklarime të pasakta, janë kryer akte fiktive noteriale dhe janë dhënë përgjigje të pasakta për pyetjet e KPK-së”.
Rovena Gashi ishte e para që hapi një betejë me Komisionin e Vettingut, ku në seancën dëgjimore në Korrik të 2018, e konsideroi vendimin e saj të paragjykuar dhe të ndërmarrë muaj më parë, atëherë kur ishin dërguar pyetjet e para nga Komisionin i Vetingut.
/a.meta
