Serbia nuk pret përfundime të rëndësishme nga seanca për Kosovën në Këshillin e Sigurimit të OKB, ku do të prezantohet raporti i sekretarit të përgjithshëm Antonio Guterres…
“Është mirë të dëgjosh zërin e së vërtetës për Kosovën, e megjithatë nuk pres përfundime të mëdha duke konsideruar polarizimin e shteteve anëtare lidhur me çështjen”, tha kryeministri Millosh Vuçeviç.
Sipas tij, çdo diskutim do të tregojë ndasitë e qarta, mes vendeve që e njohin pavarësinë dhe ata që siç tha, respektojnë sovranitetin e Serbisë në përputhje me të drejtën ndërkombëtare dhe kartën e OKB.
“Ata që mendojnë se Kosova është e pavarur, me siguri do të glorifikojnë apo justifikojnë lëvizjet e Kurtit dhe Prishtinës. Ata që respektojnë të drejtën publike ndërkombëtare do të vënë në dukje shkeljen e të drejtave dhe lirive themelore të njeriut që, fatkeqësisht, çdo ditë po ndodh ndaj serbëve dhe popullatës joshqiptare në territorin e Republikës së Kosovës”, deklaroi kryeministri Millosh Vuçeviç.
Kosova do të përfaqësohet në seancë, nga ministrja e Jashtme Donika Gërvalla. Vuçeviç kujtoi se qeveria në seancën e së hënës miratoi projektligjin lidhur me shpalljen e Kosovës si zonë e mbrojtjes së veçantë sociale, lëvizje që siç tha synon të stimulojë dhe forcoje komunitetin serb.
Ai përmendi gjithashtu projektligjin që autorizon organet e drejtësisë në Serbi të procedojnë vepra penale të kryera në territorin e Kosovës.
Çështja sipas tij, do të diskutohet së shpejti në Kuvendin e Serbisë. Vuçeviç tha gjithashtu se të gjitha aktet e miratuara në Kosovë nga 2008 , të cilat bien në kundërshti me marrëveshjet e arritura mes Beogradit dhe Prishtinës do të shpallen të paligjshme.
/a.r
