Nis seanca gjyqësore për rishikimin e masës së sigurisë për ish-kryebashkiakun e Vorës, Agim Kajmaku.
Në seancën e sotme Prokuroria kërkon “arrest me burg”, teksa e njëjta masë është dhënë edhe nga Gjykata e Tiranës, disa javë më parë.
Rishikimi i masës së sigurisë bëhet pasi një kallëzuese kundrejt tij ka ndryshuar dëshminë për falsifikimin e dokumenteve.
Më herët Gjykata e Tiranës ka vendosur masën e sigurisë “arrest me burg” në mungesë, për ish-kryebashkiakun e Vorës, Agim Kajmaku.
Ky vendim vjen një ditë pasi Prokuroria lëshoi urdhrin e arrestit ndaj tij, ndërkohë që nga kontrolli i kryer nuk u gjet në bajnesë.
Komisioni Qendror i Zgjedhjeve e shkarkoi më 1 nëntor Agim Kajmakun, duke e gjetur mandatin e tij të pavlefshëm.
Ky shkarkim erdhi pasi u verifikua nga Prokuroria se Agim Kajmaku, ka falsifikuar formularin e Dekriminalizimit, duke fshehur arrestimin dhe hetimin në Greqi për veprën penale të përdorimit të parave false, si dhe duke fshehur identitetin e rremë të përdorur në Greqi për prindërit e tij.
Kajmaku rezulton i dënuar në shtetin grek dhe njihej me emrin Jorgo Toto.
Prokuroria e Rrethit Gjyqësor Tiranë, e ka shpallur në kërkim me masë sigurimi me arrest në burg, në lidhje me hetimin që zhvillohet në ngarkim të Agim Kajmakut, i dyshuar për kryerjen e veprave penale, “Shpërdorim detyre”, “Falsifikimi i formularëve”, dhe “Ushtrimi i funksioneve pas dhënies fund të detyrës”.
g.kosovari
