Në Gjykatën e Posaçme u zhvillua seanca e radhës ndaj kryebashkiakut të Vaut të Dejës, Kristian Shkreli, i akuzuar nga SPAK për korrupsion aktiv në zgjedhje.
Sipas hetimeve, dyshohet se në fshatin Stajkë janë kryer punime në rrjetin elektrik në këmbim të votave për PSD gjatë zgjedhjeve parlamentare të 11 majit 2025.
Në seancë dëshmuan punonjës të OSHEE dhe të bashkisë, të cilët thanë se nuk kanë pasur kontakte me Kristian Shkrelin dhe se kanë kryer vetëm detyrat e tyre teknike.
Elektricisti Prek Kotaj deklaroi se ishte dërguar nga shefi i tij për shtrimin e kabllove, ndërsa shoferi i fadromës, Kastriot Gavoci, tha se kishte punuar vetëm për rrugët dhe kanalet e zonës.
Gjatë seancës pati edhe përplasje mes avokatëve mbrojtës dhe prokurorit të SPAK, Dritan Prençi, lidhur me dëshmitë e paraqitura në gjykatë.
Prokuroria kundërshtoi deklarimet e disa dëshmitarëve, duke pretenduar se ato ndryshonin nga dëshmitë e dhëna gjatë hetimeve paraprake. Nga ana tjetër, avokatët mbrojtës këmbëngulën se punimet në linjën elektrike kanë qenë procedura rutinë të OSHEE-së dhe se nuk lidhen me fushatën zgjedhore.
Seanca e radhës është caktuar më 19 maj, ndërsa procesi gjyqësor vijon me paraqitjen e provave dhe dëgjimin e dëshmitarëve të tjerë.
